Azərbaycanın II Liqasında çıxış edən "Dinamo" klubu yeddi futbolçusu ilə yolları ayırıb.
Oxu.Az Sportinfo.az-a istinadən xəbər verir ki, "Dinamo" klubunun yeddi aparıcı futbolçusu "Xankəndi" ilə matçdan (0:4) bir gün əvvəl düşərgəyə gələrək, buradan ayrılmaq niyyətində olduqlarını bildiriblər.
Buna səbəb isə futbolçulara I və II liqa klublarından sərfəli təkliflərin gəlməsi olub.
"Dinamo" Binədə keçirilən matçda öz akademiyasının yetirmələrinə etimad göstərib. Gedənlərin yerinə 10-a yaxın yeniyetmə və gənc sifariş ərizəsinə daxil edilib.
Heyətdəki bu qədər itkiyə rəğmən, komanda çempionluğa iddialı rəqibinə asanlıqla təslim olmayıb. Debütant yalnız ikinci hissədə vurduğu qollarla üç xal qazana bilib.
