Böyükağa Ağayev: "Turan Tovuz" və AFFA arasında baş verənlərdə federasiya haqlı tərəf idi"

"Klubun adından aslı olmadan, oyunun harada keçirilməsinə baxmayaraq əsasnamənin qaydalarına riayət etmək vacibdir".

Bunu Oxu.Az-a açıqlamasında . Azərbaycan Respublikasının Əməkdar məşqçisi, Azərbaycan Respublikasının əməkdar bədən tərbiyəsi və idman xadimi Böyükağa Ağayev deyib.

"Turan Tovuz"un oyundan öncə bəyanat yayması düzgün addım deyildi. Çünki, əsasnamədə canlı yayım və VAR-ın olmaması görüşün keçirilməməsinə ixtiyar verir deyə bir şey qeyd olunmayıb. Düzdür, klubda hakimlərə qarşı güvənsizlik yaranmış ola bilər. Bu da normal haldır. Amma, oyun yerli saytlarımız vasitəsi ilə yayımlandı. Belə olan halda da hansısa bir şübhəli haldan danışmaq doğru olmaz. Eyni zamanda, oyunun keçirilməməsi üçün əsasnamə qaydalarından bir və ya bir neçəsi pozulmuş olmalıdır. Misal üçün "Zirə" - "Kəpəz" görüşü keçirilməli idi, amma əlverişsiz hava şəraiti səbəbindən baş hakim oyunu təxirə saldı. Çünki əsasnamənin qaydaları buna imkan verir", - deyə B. Ağayev bildirib.

Qeyd edək ki, "Turan Tovuz" daha öncə bəyanatında canlı yayım və VAR-ın olmamasını səbəb gətirərək görüşün təxirə salınmasını tələb edib. AFFA rəhbərliyi isə əsasnamədə belə bir qaydanın olmadığını və görüşün vaxtında keçiriləcəyini bildirib.

Xatırladaq ki, "Şamaxı" - "Turan Tovuz" matçı qonaq komandanın minimal hesablı qələbəsi ilə başa çatıb.

Anar Həsənov