DÇ-2026-da yaşanan böyük uğursuzluğa baxmayaraq, Braziliya Futbol Konfederasiyası milli komandanın baş məşqçisi Karlo Ançelottini öz postunda saxlamaq qərarına gəlib.
Oxu.Az xəbər verir ki, bu barədə tanınmış idman jurnalisti Fabritsio Romano "X" sosial şəbəkəsindəki hesabında məlumat paylaşıb.
Yayılan məlumatlara əsasən, Braziliya Futbol Konfederasiyası və italiyalı mütəxəssis qüvvədə olan müqavilə çərçivəsində əməkdaşlığı davam etdirmək barədə razılığa gəliblər. Məhz Ançelottinin 2030-cu ildə keçiriləcək növbəti dünya çempionatına qədər Braziliya yığmasında əsaslı yenidənqurma prosesinə rəhbərlik edəcəyi gözlənilir.
Xatırladaq ki, Karlo Ançelotti 2025-ci ilin may ayının 26-da rəsmən Braziliya millisinin "sükanı arxasına" keçmişdi.
Qeyd edək ki, 1/8 final mərhələsində Norveç yığması Braziliya seçməsindən güclü olub və qarşılaşma Avropa təmsilçisinin 2:1 hesablı qələbəsi ilə başa çatıb. Matçın 79 və 90-cı dəqiqələrində Erlinq Holand dubl edərək komandasına qələbə qazandırıb. 90+10-cu dəqiqədə Neymar penaltini dəqiq yerinə yetirərək fərqi minimuma endirsə də, bu qol Braziliyanı məğlubiyyətdən xilas edə bilməyib.
ABŞ, Meksika və Kanadanın birgə ev sahibliyi etdiyi futbol üzrə dünya çempionatı iyunun 11-də start götürüb və iyulun 19-dək davam edəcək.
