Çempionlar Liqası: "Real Madrid" turniri tərk etdi, "Arsenal" PSJ-yə rəqib oldu

UEFA Çempionlar Liqasında 1/4 final mərhələsinin cavab matçı baş tutub.

Oxu.Az xəbər verir ki, turnirin son qalibi "Real Madrid" doğma meydanda "Arsenal"ı qəbul edib.

Oyunda əsas hadisələr ikinci hissədə cərəyan edib. Qarşılaşmada hesabı qonaqlar açıblar. 65-ci dəqiqədə Saka fərqlənib. Kral klubunun cavabı özünü çox gözlətməyib. Cəmi 2 dəqiqə sonra Vinisius hesabı bərabərləşdirib. Görüşün əlavə olunmuş dəqiqələrində Martinelli "Arsenal"ın qələbə qolunu vuraraq mübarizəyə nöqtə qoyub - 1:2.

Beləliklə də, iki oyunun nəticəsinə əsasən (1:5) "topçular" adlarını yarımfinala yazdıraraq PSJ-yə rəqib olublar. Madrid təmsilçisi isə yarışla erkən vidalaşıb.

Xatırladaq ki, Londonda baş tutan ilk matçda meydan sahibləri böyük üstünlüklə qələbə qazanmışdılar - 3:0.