Dünyanın idman ili: 2024-ün ən maraqlı YARIŞLARI

2024-cü ildə dünyada bir-birindən maraqlı idman yarışları keçirilib. Yay Olimpiya Oyunları, futbol üzrə Avropa çempionatı kimi böyük turnirlər məhz geridə qoyduğumuz ilə təsadüf edib.

Oxu.Az 2024-cü ildə keçirilən ən mötəbər idman yarışlarını yada salır.

Yanvar

2024-cü ilin ilk böyük yarışı yanvarın 11-də start götürüb. 34-cü dəfə təşkil olunan Afrika Millətlər Kubokunda "qara qitə"nin ən güclü yığmaları mübarizə aparıblar. Turnirin qalibi Kot-d'İvuar millisi olub.

Dünyanın ən güclü tennisçiləri mövsümün ilk "Böyük Dəbilqə" turnirində yarışıblar. Turnir Yannik Sinnerin qələbəsi ilə yekunlaşıb.

Fevral

Fevralın 11-də okeanın o tayında Superboul baş tutub. "Kanzas Siti" Amerika futbolu turnirinin ən güclüsü adına yiyələnib.

2024-cü ildə dünyanın əsas boks döyüşü keçirilib. Ötən ilin sonunda baş tutmayan Usik-Fyuri görüşü nəhayət gerçəkləşib. Qarşılaşma Aleksandr Usikin qələbəsi ilə başa çatıb.

Mart

Avtoidmansevərlər martın 2-də mövsümün ilk Qran-prisini izləyiblər. Start Bəhreyndə verilib. "Formula-1"in Bakı mərhələsi isə sentyabrın 13-15-də keçirilib.

May

Hokkey üzrə dünya çempionatına Çexiya ev sahibliyi edib. 16 millinin iştirak etdiyi turnir iki şəhərdə təşkil olunub. Çempionatın qalibi elə Çexiya millisi olub.

İyun

UEFA Çempionlar Liqasının həlledici matçı iyunun 1-də baş tutub. Qarşılaşma məşhur "Uembli" stadionunda keçirilib. Final matçında "Borussiya Dortmund"u 2:0 hesabı ilə məğlub edən "Real Madrid" kubokun sahibi olub.

İyul

Dörd ildən bir keçirilən futbol üzrə Avropa çempionatı Almaniyada təşkil olunub. Qələbə uğrunda qitənin 24 komandası mübarizə aparıb. Final görüşündə İngiltərə millisini 2:1 hesabı ilə məğlub edən İspaniya seçməsi Avropa çempionu adına yiyələnib.

Dünyanın idman ili: 2024-ün ən maraqlı YARIŞLARI

Dünyanın əsas veloidman yarışı "Tur de France" 111-ci dəfə keçirilib. Yarış sloveniyalı idmançı Tadej Poqaçarın qələbəsi ilə başa çatıb.

İyul/Avqust

Dünyanın ən güclü idmançılarının səbirsizliklə gözlədiyi Yay Olimpiya Oyunları 2024-cü ilə təsadüf edib. Fransa paytaxtı Paris dünyanın ən mötəbər yarışına ev sahibliyi edib. İyulun 26-da start götürən Paris-2024 Olimpiadasına avqustun 11-də yekun vurulub.

Bu il paralimpiyaçılar da mübarizəyə qatılıblar. Bu mötəbər yarışa da Fransa ev sahibliyi edib. 28 avqustda start verilən Paralimpiya Oyunları sentyabrın 8-də başa çatıb.

Dekabr

Ağırlıqqaldırma üzrə növbəti dünya çempionatına Bəhreyn ev sahibliyi edib.

Anar Həsənov