Azərbaycan güləşçisi ermənistanlı rəqibinə qalib gələrək finala çıxdı

Azərbaycanın yunan-Roma güləşçisi Eldəniz Əzizli (55 kq) Slovakiyanın paytaxtı Bratislavada keçirilən Avropa çempionatında finala yüksəlib.

Oxu.Az xəbər verir ki, təcrübəli idmançı yarımfinalda Ermənistan təmsilçisi Manvel Xaçaturyana 5:1 hesabı ilə qalib gəlib.

Murad Məmmədov (63 kq) eyni raundda türkiyəli həmkarı Kerem Kamala uduzub. İslam Abbasov (87 kq) isə bolqarıstanlı Semen Novikova məğlub olub.

Sənan Süleymanov (77 kq) 1/8 finalda türkiyəli Ahmet Yılmaza, Beka Kandelaki (130 kq) 1/4 finalda türkiyəli Hamza Bakıra yenilib.

Azərbaycan güləşçisi ermənistanlı rəqibinə qalib gələrək finala çıxdı

16:05

Slovakiyanın Bratislava şəhərində güləş üzrə Avropa çempionatı davam edir.

Oxu.Az xəbər verir ki, Azərbaycandan beş yunan-Roma güləşçisi bu gün döşək üzərinə çıxıb.

55 kq çəki dərəcəsində mübarizə aparan ikiqat Avropa çempionu Eldəniz Əzizli Vaxtanq Loluanı (Gürcüstan) vaxtından əvvəl - 9:0 hesabı ilə məğlub edərək, yarımfinala yüksəlib.

Avropa çempionu Murad Məmmədov 63 kq çəki dərəcəsində mübarizəyə qatılıb. O, startda Qleb Makarenkonu (UWW) 6:1, daha sonra İvan Lizatoviçə (Xorvatiya) 9:0 hesabı ilə qalib gələrək yarımfinala yüksəlib. Murad Məmmədovun bu mərhələdəki rəqibi Kerem Kamal (Türkiyə) olacaq.

87 kq çəki dərəcəsində mübarizə aparan İslam Abbasov təsnifat mərhələsində Şimon Şimonoviçi (Polşa) 4:0 hesabı ilə məğlub edib, daha sonra Marsel Sterkenburqa (Hollandiya) 4:1, Ekaus Mukuba (Norveç) isə 3:1 hesabı ilə qalib gələrək yarımfinala yüksəlib.

130 kq çəkidə döşək üzərinə çıxan Beka Kandelaki Mixailo Vişnevetskiyə (Ukrayna) erkən qalib gəlib - 7:1, daha sonra dörddəbir finalda Muhammet Bakirə (Türkiyə) məğlub olub - 0:2.

Avropa çempionu Sənan Süleymanov isə türkiyəli güləşçi Əhməd Yılmaza 1:2 hesabı ilə məğlub olub.

14:38

Slovakiyanın paytaxtı Bratislavada keçirilən Avropa çempionatı tədricən sona yaxınlaşır.

Oxu.Az xəbər verir ki, sərbəst və qadın güləşindən sonra bu gün yunan-Roma növündə mübarizə başlanıb.

Azərbaycan yunan-Roma güləşi yığmasının 5 üzvü bu gün xalça üzərinə çıxır. Axşam saatlarında isə bir qadın güləşçimiz bürünc medal uğrunda güləşəcək.

55 kq, 1/4 final: Eldəniz Əzizli - rəqibini gözləyir

63 kq, təsnifat mərhələsi: Murad Məmmədov - Qleb Makaranka (UWW)

77 kq, 1/8 final: Sənan Süleymanov - Ahmet Yılmaz (Türkiyə)

87 kq təsnifat mərhələsi: İslam Abbasov - Şimon Şimonoviç (Polşa) 4:0

1/8 final: İslam Abbasov- Marsel Stenkerburq (Niderland)

130 kq, təsnifat mərhələsi: Beka Kandelaki - Mixaylo Vişnivetski (Ukrayna)

Görüşlər günorta saatlarında olacaq

57 kq, 3-cü yer uğrunda görüş: Jalə Əliyeva - Elvira Kamaloğlu (Türkiyə)

Görüş axşam saatlarında olacaq

Qeyd edək ki, Azərbaycan milli komandası ümumilikdə 24 idmançı ilə Avropa çempionatına qatılıb.

Artıq çıxışını başa vuran 10 sərbəst güləşçimizdən 6-sı fəxri kürsüyə yüksəlib. Giorgi Meşvildişvili (125 kq) qızıl, Osman Nurməhəmmədov (92 kq) gümüş, İslam Bazarqanov (57 kq), Əli Rəhimzadə (65 kq), Kənan Heybətov (70 kq) və Ağanəzər Novruzov (74 kq) bürünc medal qazanıblar.

Qadın güləşində 3 təmsilçimiz mübarizəni medalsız başa vurub.