Azərbaycanı təmsil edən parabadmintonçu İbrahim Əliyev Fransanın Müluz şəhərində baş tutan nüfuzlu beynəlxalq turnirdə böyük uğura imza ataraq mükafatçılar siyahısında yer alıb.
Oxu.Az xəbər verir ki, 20 yaşlı idmançımız SU-5 kateqoriyası üzrə cütlüklərin yarışlarda polşalı tərəfdaşı Bartlomey Mrozla birlikdə bürünc medal qazanıb.
Qrup mərhələsində gərgin mübarizə nümayiş etdirən beynəlxalq cütlük əvvəlcə braziliyalı Ramos Santos və Yeyli Rodriges tandemini məğlubiyyətə uğradıb, daha sonra isə Çin Taypeyindən olan Jen Yu Fanq və Qui Yu Pu ikilisinə yenilib.
Əldə edilən bu nəticə sayəsində yarımfinala vəsiqə qazanan İbrahim Əliyev və Bartlomey Mroz cütlüyü həlledici mərhələdə malayziyalı Mohamed Azri və Çeah Lyek Hou ilə üz-üzə gəlib. Bu görüşdə məğlubiyyətlə üzləşən təmsilçimiz beynəlxalq turniri fəxri bürünc medalla yekunlaşdırıb.
