Paris-2024: Atletika yarışlarında mükafatçılarla bağlı dəyişiklik olub

Paris-2024 Yay Olimpiya Oyunlarında atletika yarışlarında gümüş və bürünc mükafatların sahibləri ilə bağlı yeni qərar verilib.

Oxu.Az Beynəlxalq Olimpiya Komitəsinin rəsmi saytına istinadla xəbər verir ki, qadınların 5000 m məsafəyə qaçışında gümüş və bürünc mükafatın sahibi ilə bağlı yeni qərar verilib. Məsələ ondadır ki, ikiqat olimpiya və dördqat dünya çempionu Keniya təmsilçisi Fait Çepnqetiç Kipyeqonun diskvalifikasiyası ləğv edilib.

O, Paris-2024-də ikinci yeri tutsa da, finişə iki dövrə qalmış efiopiyalı Qufaf Seqayın əlindən tutduğu üçün yarış bitən kimi nəticələri ləğv olunub. Bu üzdən gümüşü Sifan Hassana (Niderland), bürüncü Nadia Battoklettiyə (İtaliya) veriblər.

Sonradan Keniya idmançısının cəzasının ləğvi məqsədəuyğun sayılıb. Nəticədə Kipyeqon gümüş, Hassan bürüncə sahib çıxıb. Battokletti isə medalsız qalıb.

Qeyd edək ki, bu proqramda digər keniyalı Beatris Çebet çempion titulunu qazanıb.