"Olduqca həlledici bir səfərə yollanırıq. Rəqibimiz bizə tanış olan köhnə komandadır və o stadionda çox gözəl xatirələrimiz var".
Oxu.Az-ın məlumatına görə, bu sözləri "Qarabağ"ın baş məşqçisi Qurban Qurbanov UEFA Konfrans Liqasının pley-off mərhələsi çərçivəsində Niderlandın "Tvente" klubuna qarşı keçiriləcək ilk görüşdən öncə təşkil edilən mətbuat konfransında səsləndirib.
O bildirib ki, mövcud çətinliklərə rəğmən, səfərdən müsbət nəticə ilə dönmək üçün əllərindən gələni edəcəklər:
"Ciddi şəkildə oyuna köklənmişik. Hazırlıq üçün kifayət qədər vaxtımız olmadı, çünki artıq daxili çempionata start verilib və futbolçuların dincəlməsinə imkan yaranmayıb. Buna baxmayaraq, avrokuboklardan imtina etmək niyyətində deyilik. Avropa arenası tamamilə fərqli bir səviyyədir və biz bu mübarizəni sonadək davam etdirməkdə qərarlıyıq".
Xatırladaq ki, "Tvente" və "Qarabağ" arasındakı ilk duel avqustun 20-si, Bakı vaxtı ilə saat 22:00-da start götürəcək. Bu cütün cavab qarşılaşması isə avqustun 27-si, saat 20:00-da Tofiq Bəhramov adına Respublika stadionunda baş tutacaq.
