"Mançester Siti"nin baş məşqçisi Xosep Qvardiola "Liverpul"un sabiq məşqçisi Yurgen Kloppun klublararası dünya çempionatı ilə bağlı tənqidlərinə cavab verib.
Oxu.Az xəbər verir ki, bu barədə ESPN.com.br məlumat yayıb.
"Yurgenlə mən çox mübarizə aparmışıq, onun bu fikirlərinin nəyə əsaslandığını bilirəm. Biz İngiltərədə təqvimi daha yaxşı, keyfiyyətli, futbolçular və məşqçilərin istirahəti üçün uyğunlaşdırmaq naminə çox çalışmışıq, birlikdə UEFA ilə görüşlərdə iştirak etmişik, xüsusən də Premyer Liqada", - deyə Qvardiola bildirib.
O, Kloppun mövqeyini anladığını qeyd edib.
Daha əvvəl Klopp turniri futbolda həyata keçirilən ən pis ideya adlandırmışdı. Onun fikrincə, klublararası dünya çempionatında iştirak oyunçuları yüksək zədə riski ilə üz-üzə qoyur.
Qeyd edək ki, klublararası dünya çempionatı iyunun 15-dən iyulun 13-dək ABŞ-də keçirilir. Burada ilk dəfə olaraq 32 komanda mübarizə aparacaq. "Mançester Siti" turnirin 1/16 finalına yüksəlib və "Əl-Hilal"la qarşılaşacaq.
