Rusiya bayrağı ilə Azərbaycan çempionatına çıxdı: Tənqid edildi

Sərbəst güləş üzrə 125 kq çəki dərəcəsində U-20 Azərbaycan çempionatında çıxış edən Muxamed Qantemirovun geyimi üzərindəki Rusiya bayrağı sosial şəbəkələrdə müzakirə mövzusuna çevrilib.

Oxu.Az xəbər verir ki, onun ölkə birinciliyində başqa ölkə bayrağı ilə yarışması tənqid edilib.

Azərbaycan çempionatında idmançının başqa ölkənin bayrağı ilə xalçaya çıxması sual doğurur.

Güləş Federasiyasının mətbuat xidmətinin rəhbəri Sərxan Musalı saytımıza açıqlamasında güləşçilərin ölkə çempionatında başqa bayraqla mübarizə aparmasının qadağan edildiyini bildirib.

Federasiya rəsmisi Muxamed Qantemirovun geyimindəki Rusiya bayrağının əvvəlcədən üzərinin örtüldüyünü açıqlayıb: "Əslində, bizdə görüntülər var. Onun geyimindəki Rusiya bayrağı əvvəlcədən bağlanmışdı. Lakin bayrağın üzərinə vurulan stiker sonradan qopub. Hakimlər stikerin qopduğunu görüblər və yenidən üzərini örtüblər. Bu, finalda qısa zaman ərzində baş verib.

O, yeniyetmə idmançılar arasında Avropa ikincisi və dünya üçüncüsüdür. İdmançının trikosu var. Sadəcə itirdiyi üçün bu geyimdə gəlib. Vaxtında bizə məlumat versəydi, onu geyimlə təmin edərdik. Amma məlumat vermədiyi üçün bu cür mənzərə yaranıb".

Rusiya bayrağı ilə Azərbaycan çempionatına çıxdı: Tənqid edildi