İngiltərə millisinin baş məşqçisi Tomas Tuxel ilk ciddi təzyiqlərlə üzləşib. Nottingem şəhərində keçirilən yoldaşlıq oyununda İngiltərə yığmasının Seneqala 1:3 hesabı ilə məğlub olması azarkeşlərin narazılığına səbəb olub.
Oxu.Az xəbər verir ki, bu barədə "The Telegraph" nəşri məlumat yayıb.
Qarşılaşmanın üçüncü qolundan sonra tribunalarda narazılıq artıb. Azarkeşlər fit səsləri ilə etirazlarını bildirərək stadionu tərk etməyə başlayıblar, "Biabırçılıq!" deyə qışqırıblar və Tuxelin istefasını tələb ediblər.
Qeyd edək ki, bu nəticə İngiltərə yığmasının Afrika komandaları qarşısında tarixdə ilk məğlubiyyəti kimi qeydə alınıb.
Tomas Tuxel üçün bu, baş məşqçi kimi dördüncü oyun olub. O, indiyədək dünya çempionatının seçmə mərhələsində üç qələbə (ümumi hesab 6:0) qazansa da, ilk yoldaşlıq görüşündəcə uduzub.
