İngiltərənin əfsanəvi futbolçusu Ueyn Runi Erlinq Holand və Didye Droqbanı müqayisə edib.
Oxu.Az xəbər verir ki, o, bu barədə "The Overlap" verilişində Ceymi Karragerlə söhbəti zamanı danışıb.
Runi norveçli hücumçunun qol vurmaq baxımından Droqbadan üstün olduğunu bildirib. Bununla belə, Çempionlar Liqasının iki oyundan ibarət yarımfinal mərhələsində seçim etmək lazım gəlsə, üstünlüyü afrikalıya verəcəyini deyib:
"Holand qol vuran futbolçu kimi Droqba ilə müqayisədə daha yaxşıdır. Amma Çempionlar Liqasının yarımfinalında - evdə və səfərdə keçirilən iki oyunda komandamda hansı futbolçunu görmək istəyəcəyimi soruşsanız, Droqbanı seçərdim".
Qeyd edək ki, D.Droqba "Çelsi"nin heyətində 2012-ci ildə Çempionlar Liqasının qalibi olub. O, finalda "Bavariya"ya qarşı matçda hesabı bərabərləşdirən qolu vurub, daha sonra penaltilər seriyasında həlledici zərbəni dəqiq yerinə yetirib.
