Ueyn Runi Portuqaliya millisinin düşərgəsini icazəsiz tərk edən və daha sonra baş məşqçi Jorje Jezuşu yalan danışmaqda ittiham edən Kriştianu Ronaldunun davranışını tənqid edib.
Oxu.Az xəbər verir ki, bu barədə "A Bola" nəşri məlumat yayıb.
"Mançester Yunayted"də Ronaldunun keçmiş komanda yoldaşı olan Runi 41 yaşlı hücumçunun hərəkətlərini düzgün hesab etmədiyini bildirib.
"Ronaldu böyük futbolçudur. Messi Argentina millisindən ayrıldığını elan etdiyi gün o da Portuqaliya millisindən bu şəkildə ayrıldı və həmin bəyanatı yayımladı. Mənim fikrimcə, bu, hər mənada yanlışdır. Onun baş məşqçisinə, komanda yoldaşlarına və federasiyaya bu cür zərər vurması çox yersiz idi. Bütün proses yanlış idi. Bunu izləmək xoş deyildi.
Karyeranın sonu hər bir futbolçu üçün gəlir. Hər şeyin bitəcəyi bir məqam olmalıdır. Kriştianu bununla bacarmır və belə şeyləri izləmək getdikcə narahatlıq yaradır. Mətbuat konfransında məşqçiyə nə deməli olduğunu diktə etmək olmaz. Bu, indiyədək gördüyüm hər şeyin hüdudlarını aşır", - deyə Runi bildirib.
Xatırladaq ki, Ronaldu Norveçlə Millətlər Liqası matçında ehtiyat oyunçular skamyasında qaldıqdan sonra milli komandanın düşərgəsini tərk edib. Daha sonra Portuqaliya millisinin baş məşqçisi Jorje Jezuş futbolçunu isinmə hərəkətləri etməyə göndərməsinə baxmayaraq, onu meydana buraxmağa məcbur olmadığını bildirib.
Ronaldu isə Jezuş komandanın baş məşqçisi olduğu müddətdə milli komandaya qayıtmağı planlaşdırmadığını açıqlayıb. İddialara görə, hücumçunun ən çox narazılığına səbəb baş məşqçinin ictimaiyyət qarşısında verdiyi açıqlamalar olub.
