AMB dörd innovativ məhsulu sınaqdan keçirir

"Maliyyə sektorunun, institutlarının, bazarlarının və infrastrukturunun sabitliyinin təmin edilməsi üzrə ötən il AMB prudensial tənzimləmə çərçivəsinin modernizasiyasını davam etdirib, banklarda korporativ idarəetmə standartlarına yenidən baxıb, bununla bağlı gələcək vizyonu əks etdirən tövsiyələr qəbul edib, sığorta və investisiya şirkətləri üçün korporativ idarəetmə standartları tətbiq edib".

Oxu.Az xəbər verir ki, bu fikirləri AMB-nin İdarə Heyəti sədrinin müavini Toğrul Əliyev bu gün Bakıda keçirilən Azərbaycan Maliyyə Forumunda səsləndirib.

T.Əliyev qeyd edib ki, risklərin idarə edilməsi və effektiv nəzarət məsələlərinə xüsusi önəm verilib, riskəsaslı nəzarət üzrə siyasət konsepsiyası və bank sektoru üzrə makroprudensial siyasət çərçivəsi təsdiq edilib:

"Bu istiqamətdə banklarda ekoloji risklərin idarə edilməsi, əməliyyat risk menecmenti və s. sahələr üzrə tənzimləmələrin tətbiqinə start verilib. Bank olmayan kredit təşkilatlarının fəaliyyətinə dair yeni qaydalar qəbul olunub. Sığorta sahəsi üzrə risklərin xaricə ötürülməsi, həmçinin katastrofik risklərin təkrarsığortalanması ilə bağlı tələblər müəyyən edilib, sığortaçıların dayanıqlı təkrarsığorta siyasəti formalaşdırılıb".

Sədr müavini əlavə edib ki, ölkədə əhalinin və biznes subyektlərinin maliyyə resurslarına çıxışının genişləndirilməsi və yeni çeşid maliyyə alətlərindən istifadənin təmin edilməsi məqsədilə banklarda davranış modelləri əsasında kreditləşməyə dair prudensial tənzimlənmə çərçivəsi qəbul edilib:

"Kredit müqavilələri üzrə borcalanın həyat sığortası ilə bağlı yeni tənzimləmələr gətirilib, agent bankçılıq üçün hüquqi-normativ baza formalaşdırılıb, yaşıl taksonomiya təsdiqlənib, Daşınar Əmlakın Yüklülüyünün Dövlət Reyestri, yaşıl maliyyə və bir sıra digər sahələr üzrə məlumatlılığın artırılması məqsədilə çoxsaylı tədbirlər keçirilib".

"2023-cü ildə "Ödəniş xidmətləri və sistemləri haqqında" Qanunun qəbul edilməsi ilə ödəniş və maliyyə texnologiyaları sahəsi yeni mərhələyə qədəm qoyub. Ötən dövrdə AMB 14 elektron pul təşkilatı, səkkiz ödəniş təşkilatı və bir operatoru lisenziyalaşdırıb. Ani Ödənişlər Sisteminin əhatə dairəsinin genişləndirilməsi davam etdirilib, açıq bankçılıq üzrə tələblər təsdiq olunub. Maliyyə innovasiyalarının inkişafı məqsədilə AMB ötən ildən etibarən xüsusi tənzimləmə rejiminin tətbiqinə başlayıb. Bu məqsədlə xüsusi tənzimləmə rejiminin ayrıca internet resursu yaradılıb, artıq 21 müraciət qeydə alınıb və onlardan dörd innovativ məhsul meyarlara uyğun seçilərək xüsusi tənzimləmə rejiminə qəbul edilib. Hazırda bu innovativ məhsullar sınaqdan keçirilir", - deyə AMB rəsmisi vurğulayıb.