"Azərbaycanda kasko sığortasına yeni yanaşmalar tətbiq olunacaq".
Oxu.Az xəbər verir ki, bunu Azərbaycan Mərkəzi Bankının (AMB) sədrinin I müavini Əliyar Məmmədyarov Bakıda keçirilən XI Azərbaycan Beynəlxalq Sığorta Forumunda deyib.
Onun sözlərinə görə, dəyişikliklər beynəlxalq sığorta prinsiplərinə uyğunlaşmanı, istehlakçı məmnuniyyətinin artırılmasını və tərəflərin hüquq və öhdəliklərinin daha aydın müəyyənləşdirilməsini təmin edəcək.
Ə.Məmmədyarov bildirib ki, daşınmaz əmlakın icbari sığortası və aqrosığorta sahəsində də yeniliklər hazırlanır. Bundan başqa, işsizlikdən sığorta təminatı verən kredit sığortası məhsulu yaradılıb.
AMB rəsmisinin sözlərinə görə, sığorta bazarında aparılan təkmilləşdirmələr sektorun dayanıqlığının artırılmasına xidmət edir.
