"Cənub Qaz Dəhlizi layihəsi planlaşdırılarkən hədəf təxminən 10 milyard kubmetr idi".
Oxu.Az xəbər verir ki, bunu SOCAR-ın Qaz marketinq departamentinin rəisi Nəriman Şahsuvar Bakı Ekspo Mərkəzində Bakı Enerji Həftəsi çərçivəsində keçirilən 31-ci Beynəlxalq Xəzər Neft və Qaz Sərgisində "Cənub Qaz Dəhlizi: Enerji təhlükəsizliyi və regional əməkdaşlıq" adlı panel müzakirəsində deyib.
O bildirib ki, hazırda bu qaz həcmlərinin nəqli üçün istifadə olunan boru kəmərlərinin istismar imkanlarının maksimum həddinə yaxınlaşırıq:
"Hətta bəzi hallarda bu həddi aşmışıq. Cənub Qaz Dəhlizi çərçivəsində mövcud qaz şəbəkələrindən istifadə etməklə qazın daha çox istiqamətlərə çatdırılması üçün əlavə marşrutlar da yaratmışıq. Ümumilikdə, Azərbaycan daha çox qaz tədarük etməkdə maraqlıdır".
Onun sözlərinə görə, bu gün vəziyyət nisbətən daha asandır, çünki artıq boru kəməri sistemi və regional əlaqələr mövcuddur:
"Boru kəmərləri genişləndirilməlidir. İnfrastruktur yatırımlarına ehtiyac var. Bu yatırımların maliyyələşdirilməsi təmin olunmalıdır. Bazarda uzunmüddətli öhdəliklər olmalıdır. Bundan əlavə, tənzimləyici sabitlik və proqnozlaşdırılabilənlik də vacibdir. Uzunmüddətli tələb siqnalları olmalıdır. Çünki söhbət milyardlarla dollar həcmində böyük investisiyalardan gedir.
Bu layihələrə yalnız siyasi baxımdan yanaşmaq düzgün olmaz. Onlar həm iqtisadi, həm də texniki baxımdan əsaslandırılmış olmalıdır. Əgər bazarda uzunmüddətli tələbatın olacağına əmin deyilsinizsə, belə layihələrə investisiya yatırmaq mümkün deyil.
Eyni zamanda, maliyyə institutları da artıq qalıq yanacaqlara (fossil fuels) əvvəlki kimi yanaşmırlar. Onların strategiyalarına və internet səhifələrindəki planlarına baxdıqda görürük ki, diqqət, əsasən, yaşıl enerji layihələrinə yönəlib.
Biz bazar iştirakçıları ilə mütəmadi danışıqlar aparırıq. Lakin əvvəllər olduğu kimi, 20-25 illik uzunmüddətli müqavilələr barədə danışarkən 10 ildən sonrakı dövr üçün kifayət qədər müəyyənlik görmürük.
Müştərilər Avropada qazın gələcəyi ilə bağlı siyasətlər, bəyanatlar, yaşıl gündəm və müəyyən edilmiş hədəflər səbəbindən uzunmüddətli perspektivə əmin deyillər.
Biz hesab edirik ki, qaza uzunmüddətli tələbat qalacaq və qaz yaşıl, bərpaolunan enerji mənbələri ilə yanaşı enerji balansında vacib rol oynamaqda davam edəcək.
Amma bunun üçün bazardan aydın siqnal gəlməlidir. Əgər bazar daha çox qaz istəyirsə, bunu açıq şəkildə göstərməlidir".
