Bu ilin yanvar-oktyabr ayları üzrə sığorta şirkətlərindən ən çox sığorta haqqı toplayan "Paşa Həyat Sığorta" ASC olub.
Oxu.Az rəsmi məlumatlara istinadən xəbər verir ki, şirkət hesabat dövründə 572.9 milyon manat sığorta haqqı toplayaraq bazarda ən yüksək nəticəni göstərib. Eyni zamanda, 10 ay ərzində 479.8 milyon manat ödəniş həyata keçirərək ödənişlər üzrə də ilk sırada qərarlaşıb.
İkinci yeri "Paşa Sığorta" ASC tutub. Şirkətin yığımları 297.5 milyon manat, ödənişləri isə 115.3 milyon manat təşkil edib.
Üçüncü pillədə "Atəşgah Həyat" qərarlaşıb. Şirkət hesabat dövründə 89.1 milyon manat sığorta haqqı toplayıb və 56.3 milyon manat ödəniş edib.
Üç lider şirkətin cəmi yığımları 959.5 milyon, ödənişləri isə 651.4 milyon manat olmaqla sığorta bazarında yığımının 76.4 faizini, ödənişlərinin isə 84.3 faizini formalaşdırıb.
Hesabat dövründə ümumilikdə 1 milyard 255.9 milyon manat həcmində sığorta haqqı yığılıb, 772.6 milyon manat ödəniş edilib.
