SOCAR "yaşıl istiqraz"ların buraxılışına başlayır

Yanvarın 15-dən Dövlət Neft Şirkəti (SOCAR) "Yaşıl istiqraz"ların buraxılışına start verəcək.

Oxu.Az "Report"a istinadən xəbər verir ki, emissiyanın ümumi məbləği 200 milyon ABŞ dollarıdır.

Söhbət hər birinin nominal dəyəri 1 000 ABŞ dolları olan 200 min ədəd istiqrazdan gedir. Qiymətli kağızların illik gəlirliliyi 6% olacaq. Faizlər rüblük ödəniləcək. "Yaşıl istiqraz"ları əldə etmək üçün son tarix 28 fevral 2025-ci ildir.

İstiqrazların "yaşıl" adlandırılması təsadüfi deyil. Belə ki, istiqrazlardan əldə olunan vəsait "SOCAR Green" MMC şirkətinin bərpaolunan layihələrinə və investisiyalarına sərf ediləcək.

Məlum olduğu üzrə, Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəfləri Konfransı - COP29 tədbirinə ev sahibliyi edən ölkəmiz üçün yaşıl enerjinin inkişafı və təşviqi məsələləri prioritet əhəmiyyət daşıyır.

Bu xüsusda, "Yaşıl Gəlir, Yaşıl Gələcək" şüarı altında buraxılan istiqrazlar vətəndaşlara etibarlı və stabil gəlir qazandırmaqla yanaşı, Azərbaycanın yaşıl enerji sahəsindəki təşəbbüslərini da dəstəkləmək məqsədi daşıyır.

SOCAR bu emissiya vasitəsilə ekoloji cəhətdən təmiz enerji mənbələrinin inkişafına töhfə vermək və sürətləndirmək niyyətindədir.

Anderrayteri "Paşa Kapital" İnvestisiya Şirkəti olan "yaşıl istiqraz"ları 1 və 5 saylı "ASAN xidmət" mərkəzlərindəki SOCAR İstiqrazları köşklərindən, o cümlədən ölkəmizdə qeydiyyatdan keçmiş investisiya şirkətlərindən əldə etmək mümkündür.

Ətraflı məlumat üçün *1999 Çağrı Mərkəzi və Socaristiqraz.az, Socarcapital.az veb-saytlarına müraciət oluna bilər.

Xatırladaq ki, SOCAR daxili kapital bazarları üçün ilk istiqraz buraxılışını 2016-cı, ikincini isə 2021-ci ildə həyata keçirib.

SOCAR istiqrazları tədavülə buraxılandan bu günə qədər ən çox ticarət olunan korporativ qiymətli kağızdır.

Xatırlatmaq istərdik ki, SOCAR istiqrazları ilə bağlı rəsmi məlumatlar yalnız 1 və 5 saylı "ASAN xidmət" mərkəzləri, ölkəmizdə qeydiyyatdan keçmiş investisiya şirkətləri, yuxarıda qeyd olunan çağrı nömrəsi və veb-saytlardan əldə edilə bilər.

SOCAR "yaşıl istiqraz"ların buraxılışına başlayır