Baş katib: "Xizək Alpinizmi üzrə Dünya Kubokunun Şahdağda keçirilməsi qürurverici haldır"

"İlk dəfə olaraq Xizək Alpinizmi üzrə Dünya Kubokunun Şahdağda keçirilməsi qürurverici haldır".

Oxu.Az xəbər verir ki, bu sözləri Azərbaycan Qış İdman Növləri Federasiyasının baş katibi Günel Bədəlova turnirin açılış mərasimindən sonra jurnalistlərə açıqlamasında deyib.

Baş katib bildirib ki, Qazaxıstan və Qətəri təmsil edən idmançılar ilk dəfə olaraq Xizək Alpinizmi üzrə Dünya Kubokunda iştirak edirlər:

"Yarışda 26 ölkədən 130 atlet mübarizə aparır. Onlardan 36-sı qadın, 72-si isə kişidir. Ümid edirik ki, Azərbaycan Qış İdman Növləri Federasiyası bununla kifayətlənməyəcək və daha bir neçə mötəbər idman yarışlarına ev sahibliyi edəcək. Biz artıq Beynəlxalq Xizək Alpinizmi Federasiyasına xizək alpinizmi üzrə Avropa çempionatının 2026-cı ildə Azərbaycanda keçirilməsi üçün müraciət etmişik. İnanırıq ki, seçimlərdən uğurla keçəcək və gələn il üçün turnirin hazırlıqlarına start verəcəyik. Həmçinin hədəfimiz 2027-ci ildə dünya çempionatına ev sahibliyi etməkdir".

Qeyd edək ki, Dünya Kuboku 2026-cı ildə keçiriləcək Qış Olimpiya Oyunlarına lisenziya qazanmaq üçün kvalifikasiya yarışlarından biri hesab edilir. Gənclər və İdman Nazirliyinin dəstəyi, Beynəlxalq Xizək Alpinizmi Federasiyasının, Azərbaycan Qış İdman Növləri Federasiyasının və Şahdağ Turizm Mərkəzinin təşkilatçılığı ilə bu gün başlayan yarışa yanvarın 13-də yekun vurulacaq.

Anar Həsənov