Keçmiş vəkil Cavidan Osmanlı ilə bağlı edilən şikayət əsasında fakt üzrə cinayət işi başlanılıb.
Oxu.Az APA-ya istinadən xəbər verir ki, zərərçəkən Aygün Məhərrəmova dələduzluğa məruz qalması iddiası ilə Nərimanov Rayon Polis İdarəsinə müraciət edib.
İddiaya görə, o, ötən ilin iyul ayında Apellyasiya Məhkəməsində aparılan işində hüquqlarını müdafiə etməsi üçün vəkil Cavidan Osmanlı ilə tanış olub. İddia olunub ki, C.Osmanlı A.Məhərrəmovaya məxsus mənzilin Suraxanı Rayon Məhkəməsinin qətnaməsi ilə qaytarılacağı vədini verərək ondan 21 min 200 manat pul alıb və ona məhkəmənin adından saxta icra vərəqəsi təqdim edib.
Faktla bağlı Cinayət Məcəlləsinin 320.1-ci (Hüquq verən və ya vəzifədən azad edən vəsiqəni və ya digər rəsmi sənədi istifadə etmək məqsədilə saxtalaşdırma və ya qanunsuz hazırlama) maddəsi ilə cinayət işi başlanılıb.
Zərərçəkənin vəkili İmran Ələkbərov məlumatı APA-ya təsdiq edib.
Qeyd edək ki, 2024-cü ilin sentyabrında vəkil Cavidan Osmanlıdan edilən şikayət üzrə Pirallahı Rayon Polis İdarəsində cinayət işi başlanılıb. İttihama görə, o, 10-a yaxın şəxsə işə bərpa etməklə bağlı sənəd hazırlayıb məhkəməyə müraciət edəcəyini bildirərək vəd verib. Lakin vədinə əməl etməyib. O, zərərçəkənlərdən xeyli miqdarda pul alıb, dələduzluq etməkdə şübhəli bilinib.
Həmin ilin oktyabrında Cavidan Osmanlı Vəkillər Kollegiyasından xaric edilib.
