Sabunçu rayon Məhkəməsinin inzibati binasında ləğv edilmiş MTN-in sabiq baş idarə və idarə rəisləri, generallar Sübahir Qurbanov, Teymur Quliyev, Natəvan Mirvətova, həmin qurumun vəzifəli şəxsləri Fizuli Əliyev, Zaur Məmmədov, Natiq Alıyev, Fərhad Atayev, Anar Şirəliyev, Eşqin Əliyev, Elşad Əzizovun barəsində olan cinayət işi üzrə məhkəmə iclası keçirilib.
Bugünkü prosesdə prokuror sabiq MTN generallarının rütbələrindən məhrum edilməsi üçün ölkə başçısına təqdimat verilməsini istəyib.
Oxu.Az-ın məlumatına görə, prokuror təqsirləndirilən şəxslərin Dövlət Təhlükəsizlik Xidmətinə (DTX) vurduğu 1 milyon manat məbləğində ziyanın ödənilməsini tələb edib.
O, zərərçəkmişlərə vurulan ziyanın ödənilməsi üçün təqsirləndirilən şəxslərin əmlaklarının müsadirəsini istəyib və bununla bağlı məhkəmədən qanunauyğun qərar çıxarmasını tələb edib.
15:59
Sabunçu rayon Məhkəməsinin inzibati binasında ləğv edilmiş Milli Təhlükəsizlik Nazirliyinin (MTN) sabiq baş idarə və idarə rəisləri, generallar Sübahir Qurbanov, Teymur Quliyev, Natəvan Mirvətova, nazirliyin vəzifəli şəxsləri Füzuli Əliyev, Zaur Məmmədov, Natiq Alıyev, Fərhad Atayev, Anar Şirəliyev, Eşqin Əliyev, Elşad Əzizovun barəsində iş üzrə məhkəmə davam edir.
Oxu.Az-ın məlumatına görə, Bakı Hərbi Məhkəməsinin sədri Həbib Həsənovun sədrliyi ilə qapalı keçirilən prosesdə dövlət ittihamçısı çıxış edir.
O, təqsirləndirilən şəxslərə cəza istəyir.
İttihama əsasən, təqsirləndirilən şəxslər 2004-2015-ci illərdə mütəşəkkil dəstə tərkibində xidməti vəzifələrinin icrası ilə əlaqədar hakimiyyətdən və öz qulluq mövqelərindən sui-istifadə edərək, çoxsaylı cinayətlər törədiblər.
Onlar 2015-ci ilin axırlarında cinayət məsuliyyətinə cəlb olunublar.
Qeyd edək ki, onlar CM-nin 145.3 (qanunsuz azadlıqdan məhrum etmə, ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda), 178.3.1, 178.3.2 (dələduzluq, mütəşəkkil dəstə tərəfindən külli miqdarda ziyan vurmaqla törədildikdə), 179.3.1, 179.3.2 (mənimsəmə, mütəşəkkil dəstə tərəfindən külli miqdarda törədildikdə), 181.3.1, 181.3.2 (quldurluq, mütəşəkkil dəstə tərəfindən külli miqdarda əmlak əldə etmək məqsədi ilə törədildikdə) və 182.3.1, 182.3.2-ci (hədə-qorxu ilə tələb etmə, külli miqdarda əmlak əldə etmək məqsədi ilə törədildikdə ) maddələri ilə təqsirli bilinirlər.
