Qətldə təqsirləndirilən şəxsin məhkəməsi: Məhkum yoldaşının kömək qarşılığında təhqirinə dözmədi

Bakının Yasamal rayonunda qətl törətməkdə təqsirli bilinən 1981-ci il təvəllüdlü Təbriz Həsənovun cinayət işi üzrə məhkəmə prosesi keçirilib.

Oxu.Az-ın məlumatına görə, Bakı Ağır Cinayətlər Məhkəməsində hakim Elnur Nuriyevin sədrliyi ilə keçirilən prosesdə dövlət ittihamçısı Tural Yaqubov təqsirləndirilənə ittiham aktını elan edib.

Təqsirləndirilən şəxs ittihamla razı olmayaraq özünü qismən təqsirli bilib.

Hakim təqsirləndirilən şəxsə elan olunmuş ittihamla onun 14 ildən 20 ilədək azadlıqdan məhrum oluna biləcəyini xatırladıb.

Bundan sonra Təbriz Həsənova sərbəst ifadə üçün söz verilib.

Təbriz Həsənov ifadəsi zamanı bildirib ki, o, qətlə yetirilən Azər İbrahimovla əvvəllər həbsxanada birlikdə cəza çəkiblər, tanışlıqları da elə o zamanlardan başlayıb. Bir müddət keçdikdən sonra hər ikisi cəzasını başa vuraraq azadlığa çıxıb.

Təbriz Həsənov ifadəsində daha sonra vurğulayıb ki, onların arasında baş verən insidentə səbəb mərhum Azər İbrahimovla onun digər iki tanışı tərəfindən təhqir edilməsi olub.

Azər İbrahimov Təbriz Həsənova zəng edərək onun tanışına 200 AZN lazım olduğunu deyib, pulu verməsini kobud şəkildə tələb edib. Təbrizdə 200 AZN olmadığından onun hesabına 100 AZN göndərə bilib. Azərin ona qarşı kobud hərəkətini həzm edə bilmədiyindən bunun qisasını almaq qərarına gəlib. Bıçaq alaraq Azər və digər şəxslərlə Yasamal rayonu ərazisindəki kafelərdən birində görüşüb və baş verənlərə görə üzr istəmələrini tələb edərkən aralarında mübahisə yaranıb.

Mübahisə zamanı Təbriz Həsənov Azər İbrahimova yeddi bıçaq zərbəsi vurmaqla onu ölumcül vəziyyətə salıb. A.İbrahimovu dostları xəstəxanaya çatdırsalar da, onun həyatını xilas etmək mümkün olmayıb.

Təbriz Həsənov bundan sonra kafedən çıxıb hadisə yerindən uzaqlaşarkən yolu keçdiyi zaman avtomobil onu vuraraq ağır xəsarət yetirib.

Mayın 23-də keçirilməsi nəzərdə tutulan proses şahidlərin ifadəsi ilə davam edəcək.

Qeyd edək ki, 2024-cü ilin oktyabrın 13-də saat 22 radələrində paytaxtın Yasamal rayonu ərazisində 1987-ci il təvəllüdlü Azər İbrahimovu kəsici alətlə qətlə yetirməkdə şübhəli bilinən, əvvəllər məhkum olunmuş Təbriz Həsənov polis əməkdaşlarının keçirdikləri tədbirlərlə müəyyən edilib.

Təbriz Həsənov cinayəti əməlini törətdikdən sonra hadisə yerini tərk edərkən naməlum avtomobil tərəfindən vurulması nəticəsində xəsarət alıb və xəstəxanaya yerləşdirilib.

Müəyyən edilib ki, Azər İbrahimov oktyabrın 13-də yaxınları ilə birlikdə restoranda yeyib-içdikdən sonra dava zamanı qolundan və kürəyindən bıçaq xəsarətləri alıb.

Ağır yaralı halda tapılan Azər İbrahimov dərhal Klinik Tibbi Mərkəzə çatdırılıb. Ona tibbi yardım göstərilsə də, həyatını xilas etmək mümkün olmayıb.

İstintaq orqanı tərəfindən Təbriz Həsənovun barəsində Cinayət Məcəlləsinin 120.2.4-cü (xüsusi amansızlıqla adam öldürmə) maddəsi ilə ittiham elan edilib.