Səfərbərlik və Hərbi Xidmətə Çağırış üzrə Dövlət Xidmətinin Xaçmaz Rayon Şöbəsinə rəhbərlik etmiş və rüşvət almaqda günahlandırılan Rahim Ağayevin məhkəmə hökmündən verdiyi kassasiya şikayəti araşdırılıb.
Oxu.Az APA-ya istinadla məlumat verir ki, bu gün Ali Məhkəmədə hakim Zaur Hüseynovun sədrliyi ilə baş tutan iclasda müvafiq qərar elan olunub.
Qəbul edilən qərara görə, şikayət qismən təmin olunub.
Belə ki, təqsirləndirilən şəxsin ittiham olunduğu 341.2.3-cü (bir qrup şəxs tərəfindən vəzifə səlahiyyətlərindən sui-istifadə etmə və ya vəzifə səlahiyyətlərini aşma - bir qrup şəxs tərəfindən ağır nəticələrə səbəb olduqda) maddəsi ittiham aktından çıxarılıb. Təyin edilmiş cəza müddətinə gəldikdə isə, hökm dəyişdirilmədən saxlanılıb.
Qeyd edək ki, Bakı Hərbi Məhkəməsinin çıxardığı hökmə əsasən, Rahim Ağayev 8 il 6 ay müddətinə azadlıqdan məhrumetmə cəzasına məhkum olunub. Sumqayıt Apellyasiya Məhkəməsi də həmin qərarı qüvvədə saxlayıb.
Xatırladaq ki, R.Ağayev Baş Prokuror yanında Korrupsiyaya qarşı Mübarizə Baş İdarəsi tərəfindən saxlanılıb. Ona qarşı Cinayət Məcəlləsinin 311.3.3-cü (təkrar külli miqdarda rüşvətalma) və 308.2-ci (vəzifə səlahiyyətlərindən sui-istifadə etmə), 341.2.3-cü (bir qrup şəxs tərəfindən vəzifə səlahiyyətlərindən sui-istifadə etmə və ya vəzifə səlahiyyətlərini aşma - bir qrup şəxs tərəfindən ağır nəticələrə səbəb olduqda) maddələri ilə ittiham irəli sürülüb və barəsində həbs qətimkan tədbiri seçilib.
