30 illik ənənə: Yaponiya 2024-cü ilin heroqlifini seçdi

Yaponiyada 2024-cü ilin rəmzi seçilib.

Oxu.Az-ın TASS-a istinadla verdiyi məlumata görə, bu münasibətlə ölkənin qədim paytaxtı Kiotoda buddist "Təmiz su məbədi"ndə təntənəli mərasim keçirilib.

Bildirilir ki, 221 mindən çox insanın iştirak etdiyi ümummilli səsvermənin nəticələrinə görə, "qızıl" ("pul") mənasını verən "kin" heroqlifi ilin rəmzi seçilib. Sorğuda iştirak edənlərin 5.47%-i ona səs verib.

Məbədin buddist rahibi Seyhan Mori, ənənəyə uyğun olaraq, 130x150 sm ölçülü düyü kağızında ilin heroqlifini çəkib.

2024-cü ilin rəmzi olaraq "qızıl" heroqlifinin seçilməsi bir neçə amillə bağlıdır. Birincisi, yapon idmançıları Parisdəki Olimpiya Oyunlarında çoxlu qızıl medal qazanaraq təsirli nəticələr göstəriblər. İkincisi, Yaponiyanın Liberal Demokrat Partiyasında maliyyə hesabatlarının pozulması ilə bağlı böyük qalmaqal baş verib. Bundan əlavə, Yaponiyanın Sado adasındakı qızıl və gümüş mədənləri UNESCO-nun mədəni irs siyahısına daxil edilib.

30 illik ənənə: Yaponiya 2024-cü ilin heroqlifini seçdi

"Qızıl" heroqlifi çox vaxt olimpiya oyunları keçiriləndə ilin rəmzi seçilir, ona görə də bir çox müşahidəçilər bu il məhz onun qalib gələcəyini güman edirdilər", - deyə yerli ekspertlər qeyd edirlər.

Maraqlıdır ki, ötən il Yaponiyada ictimaiyyətin bu mövzuya artan diqqəti səbəbindən "vergi" heroqlifi ilin rəmzi seçilib. 2022-ci ildə yaponlar "döyüş, müharibə" heroqlifini, 2021-ci ildə isə yenə "qızıl" heroqlifini seçiblər ki, bu da yapon idmançıların Tokiodakı ev Olimpiadasında rekord sayda qızıl medal qazanması ilə bağlı olub.

Qeyd edək ki, ilin rəmzinin müəyyən edilməsi mərasimi Yaponiyada 1995-ci ildən keçirilir və bu il 30-cu yubiley mərasimi olub. Ənənə artıq bitmək üzrə olan ildə ölkədə ən əhəmiyyətli hadisə və fenomenləri əks etdirir.