Daşların içindən "oyandı": 240 milyon illik "əsl Çin əjdahası" aşkarlandı

Çinin Quycou əyalətində paleontoloqlar, 240 milyon il yaşı olan inanılmaz bir tapıntı "Dinocephalosaurus orientalis" adlı qədim dəniz sürünəni aşkarlayıblar.

Oxu.Az-ın thebrighterside.news-a istinadla verdiyi məlumata görə, beş metrlik bu möhtəşəm skelet, elm adamlarını onun görüntüsünü əfsanəvi "Çin əjdahası" ilə müqayisə etməyə vadar edib.

Bu qədim canlının ən diqqətçəkən xüsusiyyəti - bədən və quyruqdan daha uzun, 32 fəqərədən ibarət olan elastik boynudur. Uzun boynu və qayıqvari ayaqları "Dinocephalosaurus"un tamamilə su həyatına uyğunlaşdığını göstərir.

Elm adamları onun mədəsində yaxşı qorunmuş balıq qalıqları tapıblar, bu da onun sualtı ovçu olduğunu təsdiqləyir.

O da qeyd olunur ki, bu növ ilk dəfə 2003-cü ildə tanınsa da, yalnız indi onun tam skeleti tapılıb və unikal quruluşuna görə "Dinocephalosauridae" adlı ayrıca bir ailəyə ayrılıb.

Çin, ABŞ, Böyük Britaniya və Avropadan olan alimlərin birgə səyi nəticəsində bu canlı Trias dövrünün sirli dəniz həyatına yeni işıq salıb. Alimlərin sözlərinə görə, "Dinocephalosaurus", miflərlə gerçəkliyi birləşdirən, heyranedici bir "əjdaha" obrazıdır.