Alimlər Uqandadakı Budonqo meşəsində vəhşi şimpanzelərin unikal davranışını müşahidə ediblər: primatlar təkcə öz yaralarını dərman bitkiləri ilə müalicə etmirlər, həm də cəmiyyətin digər üzvlərinə köməklik göstərirlər.
Oxu.Az xəbər verir ki, bu kəşf "Frontiers in Ecology and Evolution" jurnalında təsvir edilib.
Tədqiqat Sonso və Vaybira adlı iki şimpanze qrupunun müşahidə məlumatlarını əhatə edir. Dörd ay ərzində alimlər 41 yara sağaltma hadisəsini, o cümlədən meymunların yalnız özlərinə deyil, həm də qrupun digər üzvlərinə qulluq etdikləri yeddi hadisəni qeydə alıblar.
Şimpanzelər mürəkkəb üsullardan istifadə ediblər: yaralarını yalayıb, onların üzərinə çeynənmiş yarpaqlar qoyub və bədənlərinin müxtəlif nahiyələrini, o cümlədən cinsiyyət orqanlarını bu yarpaqlarla siliblər. Meymunların "dərman siyahısında" rast gəlinən bir neçə bitki iltihabəleyhinə və ya müalicəvi xüsusiyyətlərə malikdir və ənənəvi təbabətdə istifadə olunur.
Maraqlıdır ki, yardım yalnız qohumlara və ya partnyorlara deyil, genetik olaraq əlaqəsi olmayan fərdlərə də göstərilib. Tədqiqatçılar vurğulayırlar ki, şimpanzelərin bu davranışı onların digər fərdlərin ağrı çəkdiyini anlamaq və ağrını yüngülləşdirməyə çalışmaq qabiliyyətinə malik olduqlarını göstərir.
Alimlər bu davranışın nə qədər geniş yayıldığını və hansı şəraitdə baş verdiyini müəyyən etmək üçün əlavə araşdırma aparmağı planlaşdırırlar. Lakin artıq bu da bəllidir ki, təbabətin əsasları bəşəriyyətin yaranmasından xeyli əvvəl mövcud ola bilərdi.
