Sinqapurlu alimlər sübut ediblər ki, fiziki fəallıq yaşlandıqca zəifləyən əzələlərdə güc və zülal mübadiləsini bərpa etməyə kömək edir.
Oxu.Az xəbər verir ki, tədqiqatın nəticələri "Proceedings of the National Academy of Sciences" nəşrində dərc olunub.
Məlumata görə, yaş artdıqca əzələlər gücünü itirir, bərpa qabiliyyəti azalır, bu isə yıxılma riskini artırır və xəstəliklərdən sonra reabilitasiyanı çətinləşdirir.
Bu prosesdə mTORC1 molekulyar kompleksi əsas rol oynayır; əzələlərin böyüməsini və zülal sintezini tənzimləyir.
Tədqiqatçılar müəyyən ediblər ki, DEAF1 geni mTORC1 fəaliyyətini gücləndirərək zülal balansını pozur və əzələ atrofiyasını sürətləndirir.
Fiziki məşqlər DEAF1 səviyyəsini aşağı salaraq əzələlərin zədələnmiş zülallardan daha effektiv təmizlənməsinə kömək edir.
Eksperimentlər göstərib ki, DEAF1 səviyyəsinin azalması milçəklərdə və yaşlı siçanlarda əzələlərin gücünü və zülal balansını bərpa edir. Gələcəkdə DEAF1-ə təsir edən yanaşmalar məşqlərin molekulyar səviyyədə faydasını təkrarlamağa imkan verə bilər.
