2023-cü il ilə vidalaşırıq. İlin bitməsinə sayılı günlər qalıb. Hər il olduğu kimi geridə qoyacağımız ildə də tanınmış şəxsiyyətləri itirdik.
Oxu.Az-ın əməkdaşı bu il vəfat edən tanınmışların siyahısını hazırlayıb.
Siyahını təqdim edirik:
Əməkdar artist, tanınmış aktrisa, hər kəsin “Toppuş bacı” kimi sevdiyi Tünzalə Əliyeva yanvar ayının 22-də uzun sürən xəstəlikdən sonra 50 yaşında vəfat edib.
O, 2007-ci ildə Azərbaycan Respublikasının “Əməkdar artist” fəxri adına layiq görülüb.
Pianoçu, musiqişünas, Əməkdar incəsənət xadimi Tərlan Seyidov uzun sürən xəstəlikdən fevral ayının 1-də 80 yaşında vəfat edib.
Azərbaycan Respublikasının əməkdar incəsənət xadimi, sənətşünaslıq doktoru və professoru, SSRİ Bəstəkarlar İttifaqının üzvü olub.
Xalq artisti Nazpəri Dostəliyevanın bacısı olan Zeynəb Dostəliyeva fevral ayının 5-də qaraciyər sirrozundan dünyasını dəyişib.
Əməkdar artist, “Qaya” dövlət ansamblının direktoru Rüfət Babayev fevral ayının 19-da ürəktutmadan dünyasını dəyişib.
Xalq artisti, Azərbaycanın kino və teatr aktyoru Ramiz Novruz fevral ayının 20-də uzun sürən xərçəng xəstəliyindən sonra 68 yaşında vəfat edib.
O 1993-cü ildə Azərbaycan Respublikasının “Əməkdar artisti” və 1998-ci ildə Azərbaycan Respublikasının “Xalq artisti” fəxri adlarına layiq görülüb.
9 may 2012-ci ildə, 30 aprel 2014-cü ildə, 6 may 2015-ci ildə, 6 may 2016-cı ildəvə 1 may 2017-ci ildə Prezident Mükafatına layiq görülüb. 9 may 2018-ci ildə Azərbaycan Respublikası Prezidentinin fərdi təqaüdünə layiq görülüb. 29 oktyabr 2019-cu ildə “Azərbaycan Respublikası Prezidentinin fəxri diplomu” ilə təltif edilib.
Azərbaycanın xalq artisti, Prezident mükafatçısı, bas opera müğənnisi Əli Əsgərov fevralın 23-də dünyasını dəyişib.
Azərbaycan mədəniyyətinin inkişafındakı xidmətlərinə görə Azərbaycan Respublikası Prezidentinin Sərəncamına əsasən 14 sentyabr 1998-ci ildə Azərbaycanın Respublikasının əməkdar artisti fəxri adına, 14 sentyabr 2012-ci il tarixində isə Azərbaycanın Respublikasının Xalq artisti fəxri adına layiq görülüb.
30 aprel 2014, 6 may 2015, 6 may 2016, 1 may 2017, 9 may 2018, 10 may 2019, 7 may 2020, 7 may 2021 və 10 may 2022-ci il tarixlərində incəsənət xadimlərinə Azərbaycan Respublikası Prezidentinin mükafatlarının verilməsi haqqında Azərbaycan Respublikası Prezidentinin sərəncamlarına əsasən Prezident mükaftlarına layiq görülüb.
Din xadimi, ilahiyyatçı Şahin Həsənli (Hacı Şahin) mart ayının 2-də qəfil ürək çatışmalığından 49 yaşında dünyasını dəyişib.
O, “Mənəvi Dünya” Milli-Mənəvi Dəyərlərimizin Təbliği İctimai Birliyini təsisçisi və sədri (2007–2023), Qafqaz Müsəlmanları İdarəsinin Nəsimi rayonu üzrə nümayəndəsi (2014–2023), QMİ-nin Qazilər şurasının sabiq üzvü olub.
Əməkdar artist Yasəf Eyvazov mart ayının 7-də vəfat edib.
.Rejissor, tanınmış prodüser, “Soy” prodakşının rəhbəri Oqtay Əliyev mart ayının 22-də yol qəzasında qəfil ürək tutmasından 54 yaşında dünyasını dəyişib.
1998-ci ilin oktyabr ayının 5-də yaradılan “SOY production” şirkətinin təsisçisi və prezidenti idi. “Ən yaxşı ssenariyə görə” I Audiovizual festival, Bakı- 2001, “Ən yaxşı animasiya işinə görə” III Beynəlxalq Audiovizual festival Bakı- 2003 mükafatlarını qazanmışdır. Oqtay Əliyev 2020-ci ildə “Azərbaycan Respublikasının əməkdar mədəniyyət işçisi” fəxri adına layiq görülmüşdü.
Azərbaycanın Xalq artisti, Teatr Xadimləri İttifaqının İdarə Heyətinin sədri, Azərbaycan Dövlət Akademik Milli Dram Teatrının bədii rəhbəri-baş rejissoru və direktoru Azər Paşa Nemətov aprelin 9-da vəfat edib.
O, 20 mart 1987-ci il “Azərbaycan SSR əməkdar incəsənət xadimi”, 24 dekabr 2002-ci il “Azərbaycan Respublikasının Xalq artisti” fəxri adına layiq görülüb.
11 avqust 2007-ci il “Şöhrət”, 12 avqust 2022-ci il “Şərəf”, 11 avqust 2017-ci il 2-ci dərəcəli “Vətənə xidmətə görə” ordeni ilə təltif olunub. 1 aprel 2005-c ildə Azərbaycan Respublikasının Prezidentinin fərdi təqaüdünə layiq görülüb.
Xalq artisti, Əməkdar incəsənət xadimi, Azərbaycan Dövlət Akademik Rus Dram Teatrının rejissoru İranə Tağızadə aprelin 9-da 65 yaşında ürəktutmasından vəfat edib.
Teatr sahəsindəki xidmətlərinə görə o, 2008-ci ildə Əməkdar incəsənət xadimi. 2013-cü ildə Xalq artisti fəxri adlarına layiq görülüb.
Azərbaycan Respublikası Prezidentinin mükafatı — 30 aprel 2014 6 may 2015-ci ildə, 6 may 2016, 1 may 2017-ci ildə, 9 may 2018, 10 may 2019. O, Azərbaycan Respublikasının Prezidentinin fərdi təqaüdçüsü idi.
Məhşur qarmon ifaçısı, Azərbaycan Respublikasının xalq artisti Aftandil İsrafilov aprel ayının 29-da uzun sürən xəstəlikdən dünyasını dəyişib.
Aftandil İsrafilov Azərbaycan ifaçılıq məktəbinin inkişafındakı müstəsna xidmətlərinə görə 1998-ci ildə Azərbaycan Respublikasının “Xalq artisti” fəxri adına, 2016-cı ildə “Şöhrət” ordeninə layiq görülmüşdür. O, 2003-cü ildən Azərbaycan Respublikası Prezidentinin fərdi təqaüdçüsü idi.
Əməkdar artist Elxan Qasımov may ayının 29-da dünyasını dəyişib. Aktyorun ölüm səbəbi aorta anevrizmasının partlaması olub.
İyulun 14-də Milli Məclisin deputatı Madər Musayev 75 yaşında qəfil ürəktutmasından vəfat edib.
Tanınmış jurnalist, televiziya aparıcısı Natəvan Babayeva iyul ayının 20-də uzun sürən xərçəng xəstəliyindən dünyasını dəyişib.
Azərbaycanın keçmiş Baş naziri Surət Hüseynov iyul ayının 31-də 64 yaşında İstanbulda vəfat edib.
Əməkdar incəsənət xadimi, kinorejissor Cəmil Fərəcov avqust ayının 1-də 77 yaşında dünyasını dəyişib.
Əməkdar memar Feyzulla Quliyev avqustun 7-də dünyasını dəyişib.
SSRİ dövründə tərtib edilmiş Bakı şəhəri Baş Planının yeganə azərbaycanlı müəllifidir.
Azərbaycan Respublikası Prezidentinin 9 noyabr 2007-ci il sərəncamı ilə ona Azərbaycanda memarlığın inkişafındakı xidmətlərinə görə “Azərbaycan Respublikasının əməkdar memarı” fəxri adı verilib.
Əməkdar artist, Azərbaycan Dövlət Mahnı və Rəqs Ansamblının solisti Aliyə Ramazanova sentyabr ayının 1-də 82 yaşında dünyasını dəyişib.
Aktrisa, rəssam Alagöz Salahova sentyabr ayının 19-da uzun sürən xəstəlikdən sonra 70 yaşında vəfat edib.
Əməkdar artist Rəhman Rəhmanovun oğlu müğənni Emil Rəhmanoğlu sentyabr ayının 19-da vəfat edib.
Azərbaycan Respublikası Milli Məclisinin deputatı Qənirə Paşayeva səhhətində yaranmış ciddi problemlərlə əlaqədar sentyabr 28-də 48 yaşında dünyasını dəyişib.
Azərbaycanın əməkdar mədəniyyət işçisi Əsəd Əsədov sentyabr ayının 23-də 76 yaşında vəfat edib.
“Şöhrət” ordenli Əməkdar mədəniyyət işçisi Fərhad Babayev oktyabrın 2-də vəfat edib.
Azərbaycan Dövlət Neft Şirkətinin (SOCAR) birinci vitse-prezidenti Xoşbəxt Yusifzadə 3 oktyabr 2023-cü ildə dünyasını dəyişib.
Tanınmış diktor Ramiz Qafarov oktyabr ayının 26-da ürəktutmasından dünyasını dəyişib.
Azərbaycanın əməkdar incəsənət xadimi, bəstəkar Mobil Babayev 10 noyabr 77 yaşında vəfat edib.
Azərbaycanın Çindəki keçmiş səfiri Yaşar Əliyev dekabr ayının 8-də vəfat edib.
Tanınmış diplomat Azərbaycanın Çin, Vyetnam, Cənubi Koreya, Şimali Koreya və Monqolustandakı səfiri vəzifələrini yerinə yetirib.
Azərbaycan teatr və kino aktyoru, Dövlət mükafatı laureatı, Prezident təqaüdçüsü, “Şöhrət” ordenli Xalq artisti Ramiz Məlik dekabrın 14-də 80 yaşında vəfat edib.
Tanınmış virtouz sənətkar Məhərrəm Nəcəfzadə dekabr ayının 21-də 57 yaşında qəfil vəfat edib.
Qeyd edək ki, Məhərrəm Nəcəfzadə 15 musiqi alətində mükəmməl ifa bacarığı ilə tanınıb. O, 2015-ci ildən İ.Əbilov adına Mədəniyyət Mərkəzinin bədii rəhbəri vəzifəsində çalışırdı.
Əməkdar mədəniyyət işçisi, rejissor Gülçöhrə Şəfiyeva dekabrın 23-də 74 yaşında dünyasını dəyişib.
Sənətkar uzun müddətdir şəkər xəstəliyindən əziyyət çəkirdi, iyun ayında bir ayağı amputasiya edilmişdi. 1994-cü ildən Heydər Əliyev Sarayının baş rejissoru olub. 2018-ci ildə Prezidentin fərdi təqaüdünə layiq görülüb.
Nəzrin Vahid
2023-cü ildə həyatını itirən məşhurlarımız - FOTO/VİDEO
Rəylər