"Obsessiya" filminin gəlirləri nümayişin beşinci həftəsonunun yekunlarına görə 265 milyon dollara çatıb.
Oxu.Az "Çempionat"a istinadən xəbər verir ki, ekran əsəri ABŞ kino reytinqində ikinci yerdə qərarlaşıb və "Kainatın hökmdarları" ilə "Çox qorxulu film 6"nı geridə qoyub.
Film seanslarının nisbətən az olmasına baxmayaraq, bütün dünyada populyarlığını qoruyub saxlayır.
Film 750 min dollarlıq büdcəsini artıq 350 dəfədən çox üstələyərək gəlir əldə edib. Ekran əsəri kino tarixinin ən gəlirli layihələrindən birinə çevrilib və tamaşaçılar arasında uğur qazanmağa davam edir. Bundan əlavə, ekran əsəri "Film Focus Features" şirkətinin ən çox gəlir gətirən filmi mövqeyini möhkəmləndirir.
"Obsessiya" qarşılıqsız şəkildə gözəl Nikiyə aşiq olan Bearın hekayəsindən bəhs edir. Bir gün o, arzuları həyata keçirən sehrli çubuq tapır və Nikinin dünyada hamıdan çox onu sevməsini arzulayır. Lakin qız ona həddindən artıq bağlanır və göstərdiyi diqqət getdikcə daha qorxulu xarakter almağa başlayır.
Filmin rejissoru məşhur "YouTube" bloqeri Karri Barkerdir.
