Roma Papası ilə vida mərasimində yerə Azərbaycan xalçası döşənmişdi?

Aprelin 21-də vəfat edən Roma Papası Fransisklə vida mərasimi onun Vatikandakı iqamətgahının kapellasında keçirilib.

Orada tabutun altında sosial şəbəkələrin Azərbaycan seqmentində çoxlu suallar doğuran xalça görünüb. Əsas sual isə "Bu, Azərbaycan xalçasıdırmı?" olub.

Oxu.Az bu sualın cavabını tapmaq məqsədilə xalçaçı rəssam, Azərbaycanın Əməkdar rəssamı, Azərbaycan Dövlət Rəssamlıq Akademiyasının Bədii toxuculuq və xalça sənəti kafedrasının professoru Məmmədhüseyn Hüseynova müraciət edib.

Ekspert qeyd edib ki, bu, Cənubi Azərbaycanda, yəni İran ərazisində olan soydaşlarımız tərəfindən toxunmuş klassik kompozisiyalardan birinə bənzəyir:

"Bu xalça dünyada İran xalçası kimi tanınır. Lakin onun struktur quruluşu "ləçəkturunc" tiplidir və Heriz xalçasına oxşayır. Xalçanın kompozisiyası, ümumi forması həmin tərzdə toxunub. Papa ilə vida mərasimində döşənən xalça "Heriz"dən bəzi elementləri ilə fərqlənir, lakin quruluşu və həndəsi elementlərin mövcudluğu xalçanı bu qrupa aid edir.

Əlbəttə, bu xalçanı artıq təkmilləşdiriblər və yeni kompozisiyalara bütün İranda rast gəlmək mümkündür. Lakin sxematik tərtib azərbaycanlılar tərəfindən yaradılıb. Bu xalçalar XVI-XVIII əsrlərdə çox populyar olublar. Onları ipəkdən və qarışıq materiallardan toxuyaraq, dünyanın hər guşəsində, o cümlədən Avropada satırdılar".

M.Hüseynov əlavə edib ki, Azərbaycanın Xalq rəssamı Lətif Kərimovun kitabında bu xalça haqqında ətraflı məlumat var.

Firəngiz Ağalarova