Bu gün Azərbaycan Milli İncəsənət Muzeyində (AMİM) Azərbaycan təsviri sənətinin görkəmli nümayəndəsi, Xalq rəssamı Oqtay Şıxəliyevin anadan olmasının 95 illiyinə həsr olunmuş "Oqtay Şıxəliyevin mozaik dünyası. Mozaika. Rəngkarlıq. Keramika" adlı sərginin açılışı keçirilib.
Oxu.Az xəbər verir ki, ekspozisiyada Azərbaycan Milli İncəsənət Muzeyinin, Azərbaycan Dövlət Rəsm Qalereyasının və şəxsi kolleksiyaların fondlarından seçilmiş, sənətkarın yaradıcılığının müxtəlif dövrlərini əhatə edən 50-dən çox əsər nümayiş etdirilir.
Rəssamın monumental əsərləri genişmiqyaslı kompozisiya həlli, dekorativ ifadəliliyi və rənglərin ahəngdar uzlaşması ilə diqqət çəkir. Bakı Sirkinin bədii tərtibatı, Heydər Əliyev adına İdman-Konsert Kompleksinin mozaik pannosu və digər monumental kompozisiyalar onun bu sahədəki sənətkarlığının parlaq nümunələrindəndir.
Sərgidə "Gənc kimyaçı" (1965), "Qobustan" (1971), "Rasim" (1975), "Rəssamın qızı Nigarın portreti" (1975), "Meksika silsiləsi" (1985), "Abşeron" (1987), "Natürmort. Güllər", "Mənzərə" (2006) və digər əsərlər təqdim olunur. Bu nümunələr sənətkarın portret, mənzərə və natürmort janrlarında yaradıcılıq axtarışlarını, rəng və kompozisiyaya fərdi yanaşmasını əks etdirir.
Oqtay Şıxəliyevin bədii irsində keramika da xüsusi yer tutur. Onun yaratdığı vazalarda və dekorativ lövhələrdə milli ornament ənənələri müasir bədii təfəkkürlə qovuşur, rəng və formanın ahəngdar vəhdəti öz ifadəsini tapır.
Azərbaycan monumental-dekorativ sənətinin inkişafında mühüm rol oynamış Oqtay Şıxəliyev özünəməxsus bədii təfəkkürü, zəngin kolorit duyumu, forma və kompozisiya axtarışları, eləcə də milli sənət ənənələrinə yaradıcı münasibəti ilə seçilir. Onun yaradıcılığında monumental-dekorativ sənət, dəzgah rəngkarlığı və keramika bir-birini tamamlayaraq vahid bədii dünya yaradır.
