20 aprel, 2023 / 13:26 1827

100 mənzil və fərdi ev şəhid ailələri və müharibə ilə əlaqədar əlilliyi olan şəxslərə təqdim edildi - FOTO

Bakı və bölgələrdə şəhid ailələri, müharibə ilə əlaqədar əlilliyi olanlara və digər imtiyazlı şəxslərə daha 100 mənzil və fərdi ev təqdim edilib.

Əmək və Əhalinin Sosial Müdafiəsi Nazirliyi tərəfindən Mənzil İnşaatı Dövlət Agentliyinin (MİDA) Hövsan yaşayış kompleksində və Abşeron, Tərtər, Goranboy, Ucar və Zərdab rayonlarında daha 100 mənzil və fərdi ev şəhid ailələri və müharibə ilə əlaqədar əlilliyi olan şəxslərə, həmçinin digər imtiyazlı şəxslərə (gözdən əlilliyi olan şəxslər, Çernobıl AES-də hərbi xidmətlə əlaqədar əlilliyi olan şəxslər və b.) təqdim edilib.

Oxu.Az xəbər verir ki, tədbirdə iştirak edən əmək və əhalinin sosial müdafiəsi nazirinin müavini Vüsal Nəsirli tədbir iştirakçılarını qarşıdan gələn Ramazan bayramı münasibətilə təbrik edib, şəhid ailələri və müharibə ilə əlaqədar əlilliyi olan şəxslərin mənzil və fərdi evlərlə təminatı proqramına ötən əsrin 90-cı illərində ümummilli lider Heydər Əliyevin təşəbbüsü və tapşırığı ilə başlandığını vurğulayıb.

Əmək və Əhalinin Sosial Müdafiəsi Nazirliyi tərəfindən icra olunan bu sosial dəstək paketi çərçivəsində mənzil, fərdi evlə təminat proqramı da beş dəfə genişlənib. 2021-ci ilin əvvəlindən İkinci Qarabağ müharibəsi şəhidlərinin ailələri və həmin müharibə ilə əlaqədar əlilliyi olanlar da mənzillə təmin olunurlar.

Qeyd olunub ki, Prezident, Silahlı Qüvvələrin müzəffər Ali Baş Komandanı İlham Əliyevin rəhbərliyi ilə Ordumuzun möhtəşəm Zəfər əldə etdiyi 44 günlük Vətən müharibəsindən sonra dövlət başçısının göstərişi ilə şəhid ailələri və müharibə iştirakçıları ilə bağlı icra olunan sosial dəstək paketi çərçivəsində ötən dövrdə 124 min şəxsə 281 min xidmət göstərilib.

Yeni mənzillərlə təmin edilən vətəndaşlar daim dəstəklə əhatə olunduqları, həmçinin yeni mənzillərlə təmin edildiklərinə görə Prezident İlham Əliyevə minnətdarlıqlarını bildiriblər.

Şəhid Əlikram Qabil oğlu Xanışovun anası Xoşqədəm Xanışova ölkə başçısının onlara olan diqqətindən razılıq edib:

“Oğlum şəhid olmazdan qabaq şeirlər yazırdı. Onun sevdiyi qıza həsr etdiyi və digər yazdığı şeirlər kitabı dərc edilib. 100 nüsxə çap edilib. Oğlumdan geriyə qalan ürəyindən keçən misralardır. Ölkə başçısına, nazirliyə də təşəkkür edirəm. Heç gözləmədiyim bir gündə zəng gəldi və mənzil veriləcəyi bildirildi. Oğlumun və digər şəhidlərin xatirəsinə göstərilən diqqət və qayğıya görə bu işdə əziyyəti keçən hər kəsə təşəkkür edirəm”.

Mənzil verilən qazilər Aqil Mustafayev, Xalid Şəkiyev, Vaqif Cəbrayılov, şəhid ailəsindən olan Mərifət Həsənova da ölkə başçısına dərin təşəkkürlərini bildiriblər.

Qeyd edək ki, bu gün təqdim edilən mənzil və fərdi evlər də daxil olmaqla 44 günlük Vətən müharibəsindən sonra şəhid ailələri və müharibə ilə əlaqədar əlilliyi olan şəxslərə 4 660, bu il üzrə 160, ümumilikdə ötən dövrdə isə 13 460 mənzil və fərdi ev verilib. Dövlət başçısının tapşırığına uyğun olaraq, 2023-cü ildə də ən azı 1 500 mənzil və fərdi ev bu kateqoriyadan olan vətəndaşlara veriləcək.