Komediya aktyoru və parodiyaçı Maksim Qalkin estrada ulduzu Alla Puqaçovanın Rusiyada solo konsert verməyi planlaşdırdığı barədə "Mash" "Telegram" kanalının yaydığı məlumatı təkzib edib.
Oxu.Az xəbər verir ki, parodiyaçı bu barədə özünün "Instagram" hesabından yazıb.
Məşhur aparıcı bu məlumatı başdan-ayağa uydurma adlandırıb.
"Onlar haradan götürüblər ki, Alla Rusiyaya getməyi planlaşdırır? Bunu necə fikirləşirlər? Niyə müxtəlif məhkəmə instansiyalarında həqiqəti müdafiə etmək Rusiyada işi davam etdirmək istəyi kimi qəbul edilir?" - deyə o bildirib.
Rusiyalı məşhur estrada müğənnisi Alla Puqaçova avqustun sonunda uşaqları ilə birlikdə vətəninə səfər edəcək.
Oxu.Az-ın məlumatına görə, bu barədə "Mash" "Telegram" kanalı yazır.
Bildirilir ki, Alla Borisovna ilin sonuna qədər Rusiyada möhtəşəm solo konsert verməyi planlaşdırır.
"50 ildən çox səhnədə olan Rusiya estradasının primadonnası milyonlarla pərəstişkarının qəlbini yenidən öz təkrarsız səsi və xarizması ilə fəth etməyə hazırlaşır", - deyə məlumatda bildirilir.
Konsertə hazırlıqdan əlavə, müğənni məşhur yumorist və teleaparıcı olan həyat yoldaşı Maksim Qalkinin xarici agent məsələsini həll etmək niyyətində olduğu vurğulanıb.
Puqaçovanın Rusiyaya səfəri bir həftəlik planlaşdırılıb. Bu müddət ərzində o, komandası ilə birlikdə konsert üçün potensial məkanları nəzərdən keçirəcək, hüquqşünaslarla görüşlər keçirəcək və bütün mümkün riskləri qiymətləndirəcək.
Qeyd edək ki, hazırda Latviyada olan Alla Puqaçova ötən ilin dekabrında qısa müddətə Rusiyada olub. O, Qryaz kəndindəki qəsrini ziyarət etmiş, pulsuz olaraq bir neçə trek yazmış (onlar artıq hitə çevrilib) və getmişdi.
