Rusiyanın Xalq artisti Larisa Dolina səhhətini bərpa etmək və yeni musiqi proqramı hazırlamaq məqsədilə konsert fəaliyyətinə təxminən bir il müddətinə fasilə verməyi planlaşdırır.
Oxu.Az TASS-a istinadən xəbər verir ki, müğənni bu barədə açıqlama verib.
İfaçının sözlərinə görə, planlaşdırılan yeniliklər ilk növbədə onun konsertlərinin musiqi proqramına aid olacaq. Lakin bundan əvvəl o, sağlamlığına vaxt ayırmalıdır.
"Son bir neçə il mənim üçün çox ağır keçdi və səhhətim pisləşdi. Buna görə də, ilk növbədə sağlamlığımı qaydasına salacağam, ikinci növbədə isə yeni proqram hazırlayacağam", - deyə müğənni bildirib.
Dolina vurğulayıb ki, artıq üzərində işlədiyi və tamamlanma mərhələsində olan çoxsaylı yeni mahnıları var.
"Məşqlərimi edib bir ildən sonra solo konsertlərimlə səhnəyə qayıdacağam", - deyə o əlavə edib.
