Ciddi perspektivlər vəd edən geosiyasi hadisə: Azərbaycan-Çin əməkdaşlığının əhəmiyyəti

"Azərbaycan Respublikası bütün dünya dövlətləri ilə, o cümlədən Çin Xalq Respublikası ilə sülh və əmin-amanlıq şəraitində yaşamaq, bu istiqamətdə əməkdaşlıq etmək niyyətindədir və möhtərəm Prezidentin Çinə cari dövlət səfəri, əslində, həm də ölkəmizin qeyd olunan konstitusion niyyətinin təntənəsi hesab olunmalıdır".

Bunu Oxu.Az-a açıqlamasında deputat Bəhruz Məhərrəmov deyib.

Onun sözlərinə görə, ötən il Astanada Azərbaycan və Çin arasında Strateji Tərəfdaşlıq haqqında Birgə Bəyannamə qəbul olunub, hazırkı səfər çərçivəsində isə hər iki dövlətin başçısı tərəfindən Birgə Bəyanat imzalanıb və bununla da hərtərəfli strateji tərəfdaşlıq münasibətlərimizin səviyyəsi daha da yüksəlib:

"Azərbaycanla Çin arasında siyasi, iqtisadi, ticari, mədəni, humanitar istiqamətlərdə əməkdaşlığın kifayət qədər geniş spektrə malik gündəliyi mövcuddur. Həm Bakı, həm də Pekin hesab edirlər ki, Azərbaycan və Çin arasında maraqların uzlaşdırılması tam mümkündür və bununla da hər iki dövlətin mənafelərinin təmin olunması ilə yanaşı, ortaya ümumbəşəri niyyətlər naminə ciddi töhfələr qoyula bilər. Bu mənada, Azərbaycan Prezidentinin Çinə dövlət səfəri çərçivəsində imzalanan sənədlərin əhatə dairəsinin genişliyi və dövlət başçılarının imzalanan sənədlər üzrə icranın reallaşması baxımından ortaya qoyduğu iradə bütövlükdə beynəlxalq münasibətlər sistemi adına ciddi perspektivlər vəd edən geosiyasi hadisədir".

"Məlumdur ki, Azərbaycan Respublikası və Çin daim bir-birlərinin ərazi bütövlüyü və suverenliyini dəstəkləyiblər, hər iki ölkənin terrorizm, ekstremizm və separatizmə qarşı birgə səyləri qəti xarakterə malik olub. Bundan başqa, Bakı və Pekin çoxsaylı beynəlxalq təşkilatlar, o cümlədən BMT, Şanxay Əməkdaşlıq Təşkilatı və digər təsisatlar çərçivəsində qarşılıqlı dəstəkdə ehtiva olunan əməkdaşlıq təcrübəsinə malikdir. Azərbaycan Prezidenti ilə görüşdə, Çin liderinin də ifadə etdiyi kimi, Pekin Azərbaycan Respublikasının Asiyada Qarşılıqlı Fəaliyyət və Etimad Tədbirləri üzrə Müşavirəyə sədrliyindən məmnundur, həmçinin Çin COP29 çərçivəsində Azərbaycanın fəaliyyətlərini yüksək qiymətləndirdiyini birmənalı şəkildə bəyan edib", - müsahibimiz deyib.

O, Azərbaycan Prezidentinin zamanında reallaşdırdığı və geosiyasi xarakter daşıyan Çinin "Bir kəmər, bir yol" layihəsinin region üzrə realizəsində önəmli və hətta həlledici hab rolunu oynamaqda olduğunu əlavə edib:

"Qeyd olunanları nəzərə alaraq birmənalı şəkildə əminliklə demək olar ki, Azərbaycan və Çin arasında əməkdaşlıq bütövlükdə Cənubi Qafqaz tarixində istər qlobal inteqrasiya, istərsə də yeni investisiya mühitinin canlanması baxımından strateji xarakterə malikdir. Azərbaycan Prezidentinin elə səfərin ilk günündə reallaşdırdığı təmaslar və keçirdiyi görüşlər isə artıq yalnız ikitərəfli xarakterlə məhdudlaşmayan Bakı-Pekin münasibətlərinin bütövlükdə beynəlxalq hüquq adına önəmli perspektivlər vəd etdiyini göstərməkdədir".

Mərahim Nəsib