"Bu gün Azərbaycan-Özbəkistan əlaqələri özünün yeni inkişaf mərhələsinə daxil olub".
Bunu Oxu.Az-a açıqlamasında Milli Məclisin deputatı Ceyhun Məmmədov deyib.
Deputat bildirib ki, iki ölkə arasında əlaqələr bütün istiqamətlərdə davamlı olaraq inkişaf edir.
"Artıq dəfələrlə cənab Prezidentimizin Özbəkistana səfər etdiyinin şahidi olmuşuq. Eyni zamanda, Özbəkistan prezidenti də dəfələrlə Azərbaycana səfər edib.
Ölkələrimiz beynəlxalq təşkilatlar, eləcə də Türk Dövlətləri Təşkilatı çərçivəsində çox sıx əməkdaşlıq edir. Bu gün bizim çox yaxşı əlaqələrimiz var. Cənab Prezidentin səfəri bu əlaqələrin daha da inkişaf etməsinə, möhkəmlənməsinə və yeni mərhələyə qədəm qoymasına ciddi və mühüm töhfə verəcək.
Bilirsiniz ki, sənəd də imzalanıb. Bu sənəddə qarşılıqlı əməkdaşlığın daha da gücləndirilməsi, yəni dövlətlər arasında strateji müttəfiqliyin daha yüksək səviyyəyə qaldırılması nəzərdə tutulur. Eyni zamanda, digər vacib məsələ müxtəlif sahələrdə əməkdaşlığın inkişaf etdirilməsidir.
Buraya turizm sahəsində əməkdaşlıq, həmçinin ən mühüm məsələlərdən biri kimi parlamentlərarası əlaqələrin gücləndirilməsi və möhkəmləndirilməsi daxildir. Bu da prioritet və vacib məsələlərdən biri kimi qarşıya qoyulub.
Elm və təhsil, turizm, eyni zamanda logistika və yüklərin daşınması sahələrində əməkdaşlıq da mühüm əhəmiyyət daşıyır.
Bütün bunlar onu deməyə əsas verir ki, qarşılıqlı əlaqələrimiz daha da inkişaf edəcək və irəli gedəcək. Özbəkistan-Azərbaycan əlaqələri hər iki ölkə liderlərinin ciddi səyləri nəticəsində böyük uğurlara və nailiyyətlərə imza atacaq", - deyə Ceyhun Məmmədov bildirib.
