"Rusiya Federal Təhlükəsizlik Xidmətinin Yekaterinburqda yaşayan azərbaycanlılara qarşı cinayətkarcasına sərgilədiyi əməliyyat və qətllər fonunda Azərbaycan-Rusiya münasibətləri gərginləşib. Birmənalı olaraq belə bir vəziyyətin yaranmasında Rusiya rəsmilərinin, xüsusi xidmət, hüquq-mühafizə orqanlarının "xidmət"i böyükdür. Soydaşlarımıza qarşı bu cür cinayətlər qarşılıqsız qala bilməzdi. Azərbaycan da öz mövqeyini sərt formada bildirib. Hazırda Rusiyada yaşayan soydaşlarımıza qarşı bu cür cinayət əməlləri həyata keçirilərək onların qorxudulması prosesi gedir".
Bunu Oxu.Az-a açıqlamasında Milli Məclisin deputatı Müşfiq Cəfərov deyib.
O bildirib ki, Rusiyada etnik və irqi zəmində toqquşmalar ölkənin əksər regionlarını əhatə etməyə başlayıb:
"Azərbaycana soydaşlarımız vasitəsilə təzyiq etmək istəyirlər. Bu, Rusiyanın istifadə etdiyi kartdır. Hər zaman ən kiçik siyasi fikir ayrılığında, bu dövlət həmin kartı istifadə edərək Azərbaycana qarşı təzyiq göstərməyə çalışır.
Rusiyada azərbaycanlılara qarşı olan təzyiqlərlə bağlı danışarkən ikitərəfli münasibətlərin, daxili siyasi proseslərin və xarici amillərin kompleks qarşılıqlı təsirini də nəzərə almaq lazımdır".
"Ümumiyyətlə, baş verən hadisələr - reydlərin sərtliyi və ölüm hadisələrinin araşdırılmasında şəffaflığın olmaması, həm Azərbaycan dövləti, həm də cəmiyyəti tərəfindən məqsədyönlü anti-Azərbaycan siyasətinin təzahürü kimi qiymətləndirilir. Rusiya isə əksinə, əməllərinin qanuni olmasında israr edir, bunu mütəşəkkil cinayətkarlığa qarşı mübarizə ilə əlaqələndirir və saxlanılanların ölümünü təbii səbəblərlə izah edir ki, bu da siyasi zərəri minimuma endirmək cəhdidir. Amma bütün hallarda Rusiyanın dövlətimizə qarşı olan bu münasibəti qəbuledilməzdir. Ümid edirəm ki, Azərbaycanın müstəqil və güclü xarici siyasətindən narahatlığı açıq-aşkar nümayiş etdirən şimal qonşumuz dövlətimizə qarşı olan münasibətində dəyişikliklər edəcək", - deyə M.Cəfərov bildirib.
Mərahim Nəsib
