"Bilik səviyyəsi aşağı olan tələbələrlə düşünmürəm ki, biz sözügedən sahədə köklü dəyişikliklərə nail ola bilərik".
Oxu.Az xəbər verir ki, bu fikirləri Milli Məclisin deputatı Qüdrət Həsənquliyev Miqrasiya Məcəlləsinə təklif olunan dəyişiklik layihəsinin müzakirəsi zamanı deyib.
O bildirib ki, aqronomluq ixtisası üzrə keçid balı 169.6, aqromühəndislik üzrə 177.2 baldır. Bunlar bu ilin statistik göstəriciləridir:
"Aqrar Universitetdə bioehtiyatlar və akvakultura üzrə 151.5 bal, baytarlıq təbabəti üzrə 153.4 bal, bitki mühafizəsi üzrə isə 178.1 baldır. Bu universitet yenidən ciddi şəkildə qurulmasa, orada əsaslı islahatlar aparılmasa, vəziyyəti dəyişmək çətin olacaq.
Hüquqşünas nazirlərdən biri demişdi ki, bizə hüquqşünaslar yox, aqronomlar lazımdır. Əlbəttə, ölkəyə hüquqşünaslar da lazımdır. Çünki hüquqi dövlət qurmadan aqrar sahəni də inkişaf etdirmək çox çətindir. Amma mən mətbuatda oxumamışam, yaxud belə bir məlumat yayılmayıb ki, bu məsələyə həqiqətən də Nazirlər Kabinetinin iclasında baxılıb? Yəni mütəxəssis hazırlığına xüsusi diqqət yetirilməsinə ehtiyac var. Hesab edirəm ki, bu, hökumətin qarşısında duran ən mühüm vəzifələrdən biri olmalıdır. Yalnız bu yolla biz bu sahədə vəziyyəti dəyişə bilərik. İndi gedib maraqlansanız, mən şəxsən maraqlanmışam, görərsiniz ki, bizim bütün aqroparklarda, heyvandarlıq komplekslərində, bitkiçilik təsərrüfatlarında çalışan yüksəkixtisaslı mütəxəssislərin əksəriyyəti, xüsusilə də Türkiyədən gələn şəxslərdir. Hətta aqromühəndislik üzrə də mütəxəssislər İrandan ölkəyə dəvət olunurlar".
