"Ədibin Evi"ndə Heydər Əliyevin anım günü münasibətilə Balaxanı neftçiləri ilə görüş olub

"Ədibin Evi"ndə ümummilli lider Heydər Əliyevin anım günü münasibətilə Balaxanı neftçilərinin siyasi xadim, alim və tədqiqatçı Həsən Həsənovla görüşü keçirilib.

Oxu.Az AZƏRTAC-a istinadən xəbər verir ki, ulu öndərin zəngin irsinin öyrənilməsi və gələcək nəsillərə ötürülməsi məqsədilə təşkil edilən tədbirdə Heydər Əliyevin neft strategiyası və xüsusilə bu il imzalanmasından 30 il ötən, onun imza əsəri "Əsrin müqaviləsi"nin müstəqil Azərbaycanın inkişaf sütununa çevrilməsi tarixinə nəzər salınıb.

"Ədibin Evi"nin icraçı direktoru Şəfəq Mehrəliyeva vurğulayıb ki, taleyin hökmü ilə Heydər Əliyevin Azərbaycana rəhbərliyə başlamasının hər iki dönəmi ölkə üçün dərin böhran zamanlarına təsadüf edib. Heydər Əliyev Azərbaycan Kommunist Partiyası Mərkəzi Komitəsinin birinci katibi vəzifəsinə seçiləndə Azərbaycan bir çox sahələrdə ümumittifaq göstəricilərindən geridə qalırdı: neft-qaz sənayesində ciddi geriləmələr mövcud idi, Xəzərdə kəşf edilən yataqların istismarı texnika və maliyyə imkanları olmadığına görə ləngiyirdi. O bildirib ki, Heydər Əliyevin atdığı ilk addımlardan biri hasilat sahəsində uzun illərdən bəri yığılıb qalmış problemlərə kompleks şəklində səmərəli həll yolları tapmaq, Azərbaycan neftçilərini səlahiyyətləndirmək idi.

"Müstəqillik dövrümüzdə xalqın tələbi ilə hakimiyyətə qayıdan ulu öndər daha dərin böhranla üzləşdi, buna baxmayaraq, az zamanda iqtisadiyyatın dirçəldilməsi üçün yenə də neft-qaz sektoruna əsaslı dəyişikliklər gətirdi. 1994-cü ilin sentyabrında yeddi ölkənin 11 məşhur neft şirkəti ilə "Əsrin müqaviləsi"nin imzalanması bu məqsədə xidmət edirdi. Azərbaycanın inkişafında dönüş nöqtəsi olan və ölkəmizi beynəlxalq aləmin enerji təhlükəsizliyi təminatçılarından birinə çevirən bu sənədin imzalanmasından keçən 30 ildə Azərbaycanın neft-qaz sənayesinə 60 milyard ABŞ dolları həcmində sərmayə qoyulub. Məhz neft strategiyası Ali Baş Komandan İlham Əliyevin rəhbərliyi altında əldə edilən tarixi Zəfərimizə zəmin yaradıb, ölkənin bütün sahələrində uğurları təmin edib", - Ş.Mehrəliyeva qeyd edib.

Ulu öndərin dövlətçilik məktəbinin yetirməsi olan Həsən Həsənov isə Heydər Əliyevin rəhbərliyi altında tutduğu müxtəlif vəzifələrdə onunla iş prosesindən xatirələrini bölüşüb. Həsən Həsənov hələ sovet dövründə Heydər Əliyevin Azərbaycanda çevik və uğurlu idarəçiliyinin əks-sədasının ümumittifaq miqyasında yayıldığını qeyd edərək, SSRİ-nin müxtəlif guşələrindən gələn yüzlərlə məktubda vətəndaşların Moskvadan məhz belə rəhbərin təyin edilməsi tələbi ilə çıxış etdiklərini bildirib. Bu isə sovet hakimiyyətinin vəzifəli şəxsləri arasında Heydər Əliyevə nüfuz qazandırmaqla bərabər, ona qarşı qısqanclıq da doğururdu. Həsən Həsənov bu günlərdə idarəçilik məktəbində tez-tez istifadə olunan "yaradıcı yanaşma"nın o zaman Heydər Əliyev tərəfindən tam tətbiq edildiyini vurğulayıb:

"O heç zaman sadəcə icraçı olmadı. Öz strateji düşüncəsi, Vətənə sevgi və xidmət missiyası Heydər Əliyevi davamlı olaraq yeniliklər gətirməyə, ölkənin bütün sahələrini dərindən anlayıb, təhlil edib yeni mütərəqqi istiqamətlər açmağa sövq edirdi".

Balaxanı neftçilərinə müraciətində Həsən Həsənov xatırladıb ki, ulu öndər Heydər Əliyevin vaxtilə böyük uzaqgörənliklə işlədiyi və bu gün Prezident İlham Əliyevin qətiyyətlə davam etdirdiyi neft strategiyası Azərbaycanın gələcək nəsillərinə hələ çox nailiyyətlər qazandıracaq. Bunun üçün hasilat sahəsində çalışanlar Heydər Əliyevin neft strategiyası irsinin məsuliyyəti və etimadını doğrultmaqda davam etməlidirlər.