Baş nazirin rəhbərlik etdiyi Azərbaycan nümayəndə heyəti İranda rəsmi anım mərasimində iştirak edib

Mayın 22-də Azərbaycan Respublikası Prezidentinin tapşırığına uyğun olaraq Baş nazir Əli Əsədovun rəhbərlik etdiyi nümayəndə heyəti İran İslam Respublikasının Prezidenti Seyid İbrahim Rəisinin, xarici işlər naziri Hüseyn Əmir Abdullahiyanın və digər müşayiət edən şəxslərin helikopter qəzasında faciəli surətdə həlak olmaları ilə əlaqədar Tehran şəhərində keçirilən rəsmi anım mərasimində iştirak edib.

Bu barədə Oxu.Az-a Nazirlər Kabinetindən məlumat verilib.

Baş nazir Əli Əsədov İran İslam Respublikasının Birinci vitse-prezidenti, Prezidentin vəzifəsini icra edən Məhəmməd Moxberlə görüşərək ona Azərbaycan Respublikasının Prezidenti, hökuməti və xalqı adından dərin hüznlə başsağlığı verdi.

Bildirilib ki, böyük dövlət xadimi, görkəmli siyasətçi Seyid İbrahim Rəisi bütün həyatını ölkəsinə fədakarlıqla və sədaqətlə xidmətə həsr edib.

Azərbaycan nümayəndə heyətinə xarici işlər naziri Ceyhun Bayramov, həmçinin Milli Məclisin Azərbaycan-İran parlamentlərarası əlaqələr üzrə işçi qrupunun üzvləri Əziz Ələkbərov, Cavanşir Paşazadə, Cəbi Quliyev və digər rəsmi şəxslər daxildir.

Baş nazirin rəhbərlik etdiyi Azərbaycan nümayəndə heyəti İranda rəsmi anım mərasimində iştirak edib

Baş nazirin rəhbərlik etdiyi Azərbaycan nümayəndə heyəti İranda rəsmi anım mərasimində iştirak edib

14:22

Azərbaycanın Baş naziri Əli Əsədov və xarici işlər naziri Ceyhun Bayramov mayın 19-da helikopter qəzasında həyatını itirən İran prezidenti və digər dövlət rəsmilərinin vida mərasiminə qatılmaq məqsədi ilə Tehrana səfər ediblər.

Azərbaycan rəsmilərini Tehran aeroportunda İran rəsmiləri qarşılayıblar.

Qeyd edək ki, İran İslam Respublikasının Prezidenti Seyid İbrahim Rəisinin, xarici işlər naziri Hüseyn Əmir Abdullahiyanın və onları müşayiət edən digər şəxslərin helikopter qəzasında faciəli surətdə həlak olmaları ilə əlaqədar dünyanın müxtəlif ölkələrindən olan dövlət xadimləri Tehranda keçirilən rəsmi anım mərasiminə qatılacaqlar.

Mənbə: Snn.ir

09:48

Baş nazir Əli Əsədov İran İslam Respublikasına səfər edəcək.

Bu barədə Nazirlər Kabineti məlumat yayıb.

Bildirilib ki, mayın 22-də Azərbaycan Respublikası Prezidentinin tapşırığına uyğun olaraq Baş nazir Əli Əsədovun rəhbərlik etdiyi nümayəndə heyəti İran İslam Respublikasının Prezidenti İbrahim Rəisinin, xarici işlər naziri Hüseyn Əmir-Abdullahianın və digər müşayiət edən şəxslərin helikopter qəzasında faciəli surətdə həlak olmaları ilə əlaqədar Tehran şəhərində keçirilən rəsmi anım mərasimində iştirak edəcək.

Nümayəndə heyətinə xarici işlər naziri Ceyhun Bayramov, Milli Məclisin Azərbaycan-İran parlamentlərarası əlaqələr üzrə işçi qrupunun üzvləri və digər rəsmi şəxslər daxildir.