Xaçatryanın işgəncə verdiyi keçmiş əsir: “Görən kimi tanıdım, azərbaycanlılara ən çox əzabı o verirdi”-VİDEO

Birinci Qarabağ müharibəsində yaralı vəziyyətdə əsir düşən və bir müddət sonra əsirlikdən qayıdan Ucar sakini ötən gün “Laçın” sərhəd-keçid məntəqəsində saxlanılan Vaqif Xaçatryanın ona verdiyi işgəncələrdən danışıb.

Ucar rayon sakini, 1971-ci il təvəllüdlü Mail Məhəmmədəli oğlu Məmmədov könüllü olaraq 1990-cı ildə Qarabağa yollanıb və döyüşlərdə iştirak edib. Yaralı vəziyyətdə əsir düşüb. Bir müddət sonra erməni əsirləri ilə dəyişilərək vətənə qayıdıb.

Mail Məmmədov ötən gün “Laçın” sərhəd-keçid məntəqəsində saxlanılan V.Xaçatryanı tanıyıb və bildirib ki, bu erməni vaxtilə ona əsirlikdə işgəncələr verib:

“Mən əsirlikdə olduğum müddətdə olmazın işgəncələrə məruz qalmışam. Amma mənə ən çox dözülməz işgəncələr verən Vaqif Xaçatryan olub. Mənim başıma qaynayan çaydanı töküb. Qaynar su başımın dərisini tamamən yandırıb, sıyırıb çıxardıb. Ürəyi soyumayan bu erməni daha sonra əvvəlcədən hazırlanmış dəmir xaçı odun sobasında qızdıraraq sinəmə basıb. Ümumiyyətlə, əsirlik dövründə azərbaycanlılara ən çox işgəncə verən keçid məntəqəsində saxlanılan Vaqif Xaçatryan olub. Ötən gün televiziyada onu görən kimi tanıdım. Mənə verdiyi işgəncələr gözümün önünə gəldi. Onu televiziyada görəndən bu vaxta kimi hələ də özümə gələ bilməmişəm”.

Qeyd edək ki, ötən gün “Laçın” sərhəd-keçid məntəqəsində keçmiş Əsgəran rayonunun Badara kəndində doğulmaqla həmin kənddə yaşayan, Azərbaycan əsirlərinə olmazın işgəncələr verən, 1955-ci il təvəllüdlü Xaçatryan Vaqif Çerkezoviç saxlanılıb.

Daha ətraflı APA TV-nin süjetində:

Xaçatryanın işgəncə verdiyi keçmiş əsir: “Görən kimi tanıdım, azərbaycanlılara ən çox əzabı o verirdi”-VİDEO