BMT Azərbaycanda HİV vəziyyətini qiymətləndirdi

Azərbaycanda immun çatışmazlığı sindromundan (HİV) əziyyət çəkənlərin, demək olar ki, yarısı (46%) müalicə alır.

Oxu.Az xəbər verir ki, bununla bağlı məlumat hər il dekabrın 1-də qeyd edilən Ümumdünya QİÇS-lə mübarizə günü ərəfəsində BMT-nin HİV/QİÇS-lə bağlı dərc etdiyi “Bilik - qüvvədir” hesabatında verilib. 

Mütəxəssislərin fikrincə, HİV-in yoxlanılması asan proses olsa da, çoxları bu testdən keçmək istəmir. 

Bunun səbəbləri ilə bağlı danışarkən mütəxəssislər ayrı-seçkilik qorxusunu, məxfiliyin pozulmasını, qohum və qonşular tərəfindən pislənməsini, cinayət təqibini, virusun aşkarlandığı təqdirdə zorakılığı qeyd ediblər. 

Respublika QİÇS-lə Mübarizə Mərkəzinin Monitorinq və qiymətləndirmə şöbəsinin müdiri Natiq Zülfüqarovun sözlərinə görə, bəzi xəstələr müxtəlif səbəblərdən müalicə almırlar. 

O bildirib ki, bəziləri dərmanları qəbul etməkdən imtina edir; digərləri gəlib dərmanları götürməyi özünə sığışdırmır; bəziləri ölkə sərhədlərindən kənarda çalışır, Azərbaycana qayıtdıqda müalicə alır və yenidən ölkəni tərk edirlər; digərlərinin antiretrovirus terapiyasına ehtiyacı yoxdur və s. 

N.Zülfüqarov əlavə edib ki, HİV-lə mübarizə üçün dərmanlar dövlət tərəfindən pulsuz paylanır. 

Əlavə edək ki, Azərbaycanda Avropa həftəsi çərçivəsində HİV və hepatit yoxlanması könüllü və pulsuz həyata keçirilir. Bu il ümumavropa kampaniyası noyabrın 23-dən 30-dək keçirilir. 

Avropa yoxlanış həftəsində əsas məqsəd daha çox insanın özünü HİV infeksiyası və hepatitlə bağlı statusunu öyrənməsini təmin etmək və bu infeksiyaların aşkarlanması problemini minimuma endirməkdir. 

Səhiyyə Nazirliyinin QİÇS-lə Mübarizə Mərkəzinin məlumatına əsasən, 2017-ci ilin sonlarına görə Azərbaycanda 5 661 nəfərdə HİV infeksiyası aşkar edilib, antivirus terapiyası üçün preparatları onların ¾-ü, yəni 74,3 faizi və ya 4207 nəfəri əldə edir. 

www.oxu.az