Bakı şəhəri, Xətai rayonu, Mirzə Davud Hüseynov küçəsi 31/5 ünvanında yaşayan sakinlər ərazidə yaranan təhlükəli vəziyyətdən şikayətçidirlər.
Oxu.Az-a müraicət edən sakinlərin sözlərinə görə, həyətdə yerləşən iri ağac illərdir böyüməkdə davam edir. Ağacın gövdəsi ildən-ilə qalınlaşdıqca yaxınlığındakı qaz borusunu sıxmağa başlayıb. Nəticədə dayaq dirəyi də əyilib. Sakinlərin iddiasına görə, boru artıq qırılmaq təhlükəsi ilə üz-üzədir. Bu isə partlayış ehtimalına görə onların narahatlığına səbəb olub.
Sakinlər iddia edirlər ki, bu problem uzun illərdir davam edir. Onların sözlərinə görə, əraziyə baxış keçirən "Azəriqaz" əməkdaşı ağacın qəzalı vəziyyətdə olduğunu və kəsilməsinin zəruriliyini bildirib. Lakin qeyd olunub ki, sakinlər ağacı öz təşəbbüsləri ilə kəsə bilməzlər.
Şikayətçilər məsələ ilə bağlı aidiyyəti qurumlardan operativ tədbir görülməsini, təhlükə yaradan ağacın qanunvericiliyin tələblərinə uyğun şəkildə götürülməsini və qaz xəttinin təhlükəsizliyinin təmin edilməsini xahiş edirlər.
Hadisə ilə bağlı Xətai Rayon İcra Hakimiyyətindən Oxu.Az-ın sorğusuna cavab olaraq bildirilib ki, məsələdən məlumatlıdırlar:
"Bu barədə aidiyyəti qurumlara məlumat verilib".
