Binəqədidə sahibsiz it problemi: "Blokdan çıxmağa qorxuruq"

Binəqədi rayonunda sahibsiz itlər vətəndaşların sərbəst hərəkətinə mane olurlar.

Bununla bağlı Oxu.Az-a şikayət daxil olub.

Vətəndaş bildirir ki, söhbət 7-ci mikrorayon, Abay Kunanbayev küçəsi, 108 ünvanından gedir.

"Sürü ilə gəzən sahibsiz itlərə görə həyətə də rahat düşə bilmirik. Blokdan çölə çıxmaq olmur, çünki yığışıb orada yatırlar. Bir neçə dəfə sakinlərə hücum ediblər. Uşaqları məktəbə aparıb-gətirmək, yaşlı insanların rahat hərəkəti çox çətindir, amma heç bir tədbir görən yoxdur", - deyə şikayətdə bildirilir.

Məsələ ilə bağlı Oxu.Az-ın sorğusuna cavab olaraq Binəqədi Rayon İcra Hakimiyyətindən bildirildi ki, sözügedən problemlə bağlı aidiyyəti üzrə müraciət edilib.

Əzizə İsmayılova