Ceyhun Kərəmov: "Bu il peşə təhsili müəssisələrinə 25 min tələbə qəbulu həyata keçirilib"

Quba, Füzuli, Şuşa, Qax rayonlarında yeni peşə təhsil müəssisələrinin açılması planlaşdırılır.

Oxu.Az xəbər verir ki, bu sözləri Peşə Təhsili üzrə Dövlət Agentliyinin direktoru Ceyhun Kərəmov "Peşə təhsilverəni: Yeni çağırışlar və perspektivlər" mövzusunda keçirilən konfransda deyib.

Direktor vurğulayıb ki, son 10 ildə Bakı, Bərdə, Qəbələ, Gəncə, Cəlilabad İsmayıllı, Lənkəran rayonlarında müasir peşə təhsil müəssisələri yaradılıb:

"Bu il peşə təhsili müəssisələrinə 25 min tələbə qəbulu həyata keçirilib. Bu son 10 ildə olan ən yüksək göstəricidir. 2026-cı ilə qədər 28 minə yaxın tələbə qəbulunun həyata keçirilməsi planlaşdırılır".

Direktor qeyd edib ki, son 6-7 ildə peşə təhsili üzrə 100-ə yaxın proqram hazırlanıb, yaxud da mövcud olanlar yenilənib:

"550 mindən çox dərslik çap olunaraq peşə təhsili müəssisələrinə çatdırılıb. Yerli müəlliflər ilə yanaşı, beynəlxalq standartlara uyğun dərsliklərin tələbələrə çatdırılması istiqamətində də iş aparırıq. 60 dərslik artıq tərcümə edilib, tələbələrə çatdırılır".

Daha çox foto burada: PhotoStock.az

Aygün Mirakif