Metronun "Memar Əcəmi" stansiyasından Masazır qəsəbəsinə hərəkət edən 525 nömrəli marşrut avtobusunun bəzi dayanacaqlarda saxlamaması ilə bağlı iddia səsləndirilib.
Sərnişinlərdən biri dayanacağın önündə bunu videogörüntü ilə əyani formada göstərib. Paylaşımın şərh bölməsində 525 nömrəli marşrut avtobusunun sürücüsü olduğunu iddia edən Elvin Ələkbərov adlı şəxs avtobusda yer olmayanda saxlamadıqlarını dilə gətirib.
Məsələ ilə bağlı Azərbaycan Yerüstü Nəqliyyat Agentliyindən (AYNA) Oxu.Az-ın sorğusuna cavab olaraq bildirilib ki, 525 nömrəli marşrutun daşıyıcısına xəttin nizamlı fəaliyyətinin təmin olunması, sərnişindaşıma qayda və normalarına riayət edilməsi ilə bağlı tapşırıqlar verilib.
Məlumatda vurğulanıb ki, marşrut avtobusları hərəkət sxemi üzrə təyin olunmuş dayanacaq məntəqələrində mütləq qaydada saxlamalıdırlar:
"Sərnişinlərin minib-düşməsi də yalnız dayanacaq məntəqələrində həyata keçirilməlidir.
Qeyd edək ki, sözügedən video araşdırılıb. Təyin olunan dayanacaqda saxlamayan avtobusun sürücüsü barədə ölçü götürülərək işinə xitam verilib".
Açıqlamada əlavə olunub ki, əsassız şərh yazan istifadəçi barədə də araşdırma aparılıb:
"Məlum olub ki, özünü 525 nömrəli avtobusun sürücüsü kimi təqdim edən Elvin Ələkbərov vaxtilə bu xətdə sürücü kimi çalışıb. İntizamsızlıq səbəbindən işindən azad edilib.
Eyni zamanda, 525 nömrəli marşrutun daşıyıcısına sürücülərin təlimatlandırılması və nəzarətin gücləndirilməsi barədə xəbərdarlıq olunub".
Məhərrəm Əliyev
