"Bu günlərdə Azərbaycan futbolunda böyük bir qalmaqal baş verdi. Bir iş adamı "Turan Tovuz" klubunu götürür, milyonlarla vəsait xərcləyir, komandanı Avropa kuboklarına daşıyır, sonra məlum olur ki, bu komanda 10 il ərzində Avropa yarışlarında iştirak edə bilməz. Çünki əvvəlcədən tətbiq olunmuş hansısa cəza var imiş. Həmin cəza ilə bağlı da kluba əvvəlcədən, mətbuatda yazıldığı kimi, heç bir məlumat verilməyib".
Oxu.Az xəbər verir ki, bunu deputat Fazil Mustafa Milli Məclisin növbədənkənar sessiyasının bugünkü ilk iclasında deyib.
O bildirib ki, bu özü korrupsiyanın bir təzahürüdür:
"Korrupsiyaya qarşı mübarizə haqqında" qanunun 2.1.8-ci maddəsində göstərilir ki, qanunla müəyyən edilmiş hallarda dövlət orqanlarının səlahiyyətlərini yerinə yetirən qeyri-dövlət qurumlarında təşkilati-sərəncamverici və ya inzibati-təsərrüfat funksiyalarını həyata keçirən şəxslər də korrupsiya hüquqpozmalarının subyekti hesab oluna bilərlər. Belə bir vəziyyətdə bu cür əməlin hansı nəticələr doğurduğunu qeyd etmək istəyirəm. Bundan sonra hansı iş adamı milyonlarla vəsait xərcləyərək bölgədə bir komandanı dirçəltmək, orada idman həyatını canlandırmaq istəyəcək? Kim belə riskə gedəcək? Ona görə də biz belə məsələlərə kiçik epizodlar kimi baxmamalıyıq".
