Sosial şəbəkələrdə Kliniki Tibbi Mərkəzdə (KTM) ağır xəstələrin daşınması üçün istifadə olunduğu iddia edilən xərək (katalka) ilə bağlı görüntülər yayılıb. Paylaşımlarda katalkanın tibbi standartlara uyğun olmadığı, PVC plastik boruların birləşdirilməsi ilə hazırlandığı irəli sürülüb.
Oxu.Az xəbər verir ki, məsələ ilə bağlı TƏBİB açıqlama yayıb.
Bildirilib ki, Kliniki Tibbi Mərkəzin Radiologiya şöbəsində istifadə olunan təkərli xərək (katalka) xəstələrin maqnit-rezonans tomoqrafiyası (MRT) zamanı təhlükəsiz şəkildə daşınması və müayinə aparatına yerləşdirilməsi üçün xüsusi olaraq plastik borulardan hazırlanıb.
Qeyd olunub ki, MRT müayinəsi zamanı maqnit sahəsinə reaksiya verməyən xüsusi katalkalardan istifadə edilir. Bu səbəbdən həmin avadanlıq metal deyil, maqnit təsirinə məruz qalmayan materiallardan hazırlanır.
TƏBİB vurğulayıb ki, sözügedən həll dünya təcrübəsində də tətbiq olunur və aşağı büdcəli, eyni zamanda səmərəli alternativlərdən biri hesab edilir.
