Sosial şəbəkələrdə "Omari.too" adı ilə tanınan 19 yaşlı qazaxıstanlı bloqer və poliqlot Omar Aliyev müxtəlif dillərdə sərbəst danışdığı qeyri-adi videoları sayəsində çoxmilyonluq izləyici auditoriyası toplayıb.
Onun "TikTok" platformasındakı videoları mütəmadi olaraq milyonlarla baxış toplayır. Xarici dilləri öyrənməyə olan həvəsi və səyahətlər onun həyatının ayrılmaz bir hissəsinə çevrilib.
Oxu.Az-a verdiyi müsahibəsində Omar Azərbaycanla olan əlaqəsindən, Azərbaycan dilinə olan sevgisindən, səfərlərindən, videolarının hazırlanma prosesindən və hansı dili ən çətin hesab etdiyindən danışıb.
- Qazaxıstanda doğulub boya başa çatmısınız, lakin sizi Azərbaycanla bir çox şey bağlayır. Bu əlaqənin necə yarandığını və ölkənin həyatınızda hansı yeri tutduğunu izah edə bilərsinizmi?
- Əslində bir çoxları mənim azərbaycanlı olduğumu düşünürlər, lakin bu, tam olaraq belə deyil. Buna baxmayaraq, Azərbaycan mənim həyatımda xüsusi bir yerə sahibdir. Valideynlərim uzun müddət orada yaşayıblar, buna görə də uşaqlıqdan evimizdə tez-tez Azərbaycan dili eşidilirdi, mənə Azərbaycan xalqı, adətlər və mədəniyyət haqqında danışırdılar. Daha sonra ailəmizin yaxınları arasında çoxlu azərbaycanlılar oldu və məhz bunun sayəsində dili erkən yaşlarımdan anlamağa başladım və onu sevdim. Buna görə də Qazaxıstanda doğulmağıma baxmayaraq, Azərbaycanla hər zaman çox isti bir bağ hiss etmişəm. Mənim üçün kimlik yalnız doğulduğun yer deyil, həm də səni uşaqlıqdan müşayiət edən xatirələr, dil, mədəniyyət və insanlardır.
- Azərbaycan mədəniyyətində sizə ən doğma gələn nədir?
- Çox güman ki, məni ən çox təsirləndirən insanlarıdır. Azərbaycanlılar olduqca qonaqpərvər, səmimi və açıqürəklidirlər. Azərbaycana səfər edərkən özünü turist kimi deyil, çoxdan gözlənilən bir qonaq kimi hiss edirsən. Təbii ki, mətbəx barədə danışmamaq mümkün deyil. Azərbaycan plovu mənim dadına baxdığım ən ləzzətli yeməklərdən biridir. Həmçinin Bakının aurası, tarixini və adət-ənənələrini qoruyub saxlayan bu müasir şəhər mənim çox xoşuma gəlir.
- Azərbaycana ilk dəfə gələn əcnəbiyə nələri görməyi və dadmağı tövsiyə edərdiniz?
- İlk növbədə Bakıda sadəcə gəzməyi məsləhət görərdim. Dənizkənarı bulvar, İçərişəhər, gecə gəzintisi - bütün bunlar unikal bir atmosfer yaradır. Mütləq Azərbaycan plovunun, qutabların, dolmanın və çayın dadına baxmaq lazımdır. Ən əsası isə insanlarla ünsiyyət qurmaqdan çəkinməməkdir. Bəzən məhz təsadüfi söhbətlər ölkə haqqında ən unudulmaz xatirələri formalaşdırır.
- Azərbaycan dili həyatınızda necə bir rol oynayır?
- Azərbaycan dili həqiqətən də həyatımda mövcuddur. Azərbaycan dilində danışmaq kiməsə daha rahatdırsa, həmin insanla qarşılaşdıqda mən həmişə məmnuniyyətlə bu dilə keçirəm. Mənim üçün dil sadəcə kommunikasiya vasitəsi deyil. Bu, qarşı tərəfə daha da yaxınlaşmaq, onun mədəniyyətinə hörmət nümayiş etdirmək və söhbəti daha səmimi etmək üçün bir fürsətdir.
- Hansı dildə düşünürsünüz?
- Bu, ən maraqlı suallardan biridir. Düzünü desəm, bəzən mənə elə gəlir ki, mən heç bir konkret dildə düşünmürəm. Hər şey mövcud vəziyyətdən, ətrafımdakı insanlardan və hətta olduğum ölkədən asılıdır. Bəzən fikirlər rus dilində, bəzən ingiliscə, bəzən isə digər dillərdə yaranır. Ehtimal ki, zaman keçdikcə beyində sözlərlə izah edilməsi çətin olan özünəməxsus daxili bir dil formalaşır.
- Öyrənilməsi ən çətin olan dil hansı oldu və nə üçün?
- Yəqin ki, Kamboca dili olan kxmer dili. Bu dil indiyədək öyrəndiyim əksər dillərdən çox fərqlənir. Fərqli tələffüz, qeyri-adi yazı sistemi və sözlərin quruluşunda tamamilə başqa bir məntiq var. Lakin kifayət qədər vaxt ayrılarsa, istənilən dil daha anlaşılan olur. Hər zaman ən çətini ilk addımı atmaqdır.
- Sizin üçün ən gözəl səslənən dil hansıdır?
- Səmimi qəlbdən inanıram ki, çirkin və ya gözəl dil anlayışı yoxdur. Hər bir dil bənzərsizdir və öz xalqının keçmişini əks etdirir. Əlbəttə ki, bir çoxları fransız dilinin səslənmə baxımından ən gözəl dillərdən biri olduğunu düşünür və mən bunun səbəbini anlayıram. Ancaq şəxsən mənim üçün dilin gözəlliyini onda danışan insanlar müəyyən edir.
- Sizcə hansı dil sizə ən məntiqli görünür? Bəs ən gözlənilməz olanı hansıdır?
- Mənim üçün ən məntiqli dil yəqin ki, türk dilidir, çünki onun çox aydın strukturu var və qaydaların əksəriyyəti ardıcıldır. Ən proqnozlaşdırıla bilməyən dil kimi isə ingilis dilini qeyd edərdim. Bəzən hər hansı bir söz yazıldığı kimi oxunmur və onlarla dil öyrəndikdən sonra belə, bu, hələ də insanı təəccübləndirə bilir.
- Bir videonun hazırlanmasına nə qədər vaxt sərf olunur?
- Çoxları elə bilirlər ki, əgər video 30 saniyə davam edirsə, onu çəkmək də elə yarım dəqiqə vaxt aparır. Əslində vəziyyət tamamilə fərqlidir. Hər bir videonun arxasında böyük bir hazırlıq prosesi dayanır. İdeya tapmaq, məlumatı yoxlamaq, ssenarini, montajı və çəkilişi planlaşdırmaq lazımdır. Bəzən bu hazırlıqlar bir neçə saat, bəzən isə günlərlə davam edir. Qısa bir videonun arxasında nə qədər əziyyət olduğunu görmələri üçün bəzən izləyicilərimizə kadrarxası görüntüləri də nümayiş etdirmişik.
- Videolar üçün ideyaları kim düşünür, siz, yoxsa komandanız?
- İdeyaların böyük bir hissəsi, xüsusən də dillərlə bağlı olanlar mənim ağlıma gəlir. Bu, mənim ən yaxşı hiss etdiyim istiqamətdir. Lakin yeni formatları müzakirə etmək, trendləri izləmək və ideyalara fərqli prizmadan baxmaq üçün mənə kömək edən möhtəşəm bir komandam var. Bu, hər kəsin bir-birini tamamladığı müştərək bir işdir.
- Siz çox səyahət edirsiniz. Sizi ən çox təəccübləndirən ölkə hansı olub?
- Düzünü desəm, hər bir yeni ölkə məni heyrətləndirir. Məhz buna görə də səyahət etməyi bu qədər çox sevirəm. Bəzi yerlərdə təbiət, digərlərində memarlıq, başqa yerlərdə insanlar, mədəniyyət və ya adət-ənənələr məni məftun edir. Ölkələri bir-biri ilə müqayisə etməməyə çalışıram, çünki onların hər biri özlüyündə bənzərsizdir və insanda xüsusi xatirələr buraxır.
- Nə vaxtsa özünüzü yaratdığınız obrazın girovu kimi hiss etmisinizmi?
- Yəqin ki, xeyr. Çünki sosial şəbəkələrdə gündəlik həyatımda necəyəmsə, elə olmağa cəhd edirəm. Mən rol oynamıram və saxta bir imic yaratmıram. Ən maraqlısı odur ki, insanlarla görüşəndə onlar mənim fərqli biri olduğumu deyil, əksinə, reallıqda təsəvvür etdiklərindən daha uzunboylu olduğumu deyirlər. Mənim üçün həm kamera qarşısında, həm də ondan kənarda özüm olaraq qalmağımın ən yaxşı sübutu budur.
